Kulumbaisha 96 - Baibo Busansulushi Bwa Libuku IliLesa ngomwaami wiindaawo pabamaami boonse ( 1 Maka 16:23-33 ) 1 Amwiimbile Mwaami Lesa lwiimbo lupya. Nocishi coonse, amwiimbile Mwaami Lesa! 2 Amwiimbile Mwaami Lesa cakumulumbaisha. Nshiku shoonse amwaambilishe makani abotu akwaamba ayi wakatupulusha. 3 Amwaambilishe bulemu bwakwe kumishobo yoonse, Amwaambilishe milimo yakwe ya nkusu kubantu boonse. 4 Mwaami Lesa uleendaawo alimwi ulyeelete kulumbaishikwa. Ncakwiila ulyeelete kulemekwa kwiinda balesa boonse. 5 Balesa ba mishobo imwi yoonse nshibumbwabumbwabo, sombi Mwaami Lesa ngowakalenga liculu. 6 Bulemu abwaami shilimushingulukite, nkusu akubota shili muŊanda yakwe. 7 Amulumbaishe Mwaami Lesa noonse nobamucishi ca panshi. Amulumbaishe bulemu ankusu shakwe. 8 Amulumbaishe liina lyabulemu lya Mwaami Lesa. Amulete cipo akwisa muŊanda yakwe. 9 Amulambile Mwaami Lesa mubulemu bwa bululami bwakwe. Amututume kunembo lyakwe nobamucishi coonse! 10 Amwaambile mishobo yoonse ayi, “Mwaami Lesa ngumwaami. Cishi ca panshi ciliimfwi mumusena womwi, aboobo tacitenkaani. Lesa uyo ulaakoombolosha bantu boonse cabululami.” 11 Liculu acishi ca panshi ashisangalale! Alwalo lweenge aluwoote pantu pomwi ashintu shoonse shiliimo! 12 Myuunda ashoonse shiliimo ashisangalale! Shisamu muluundu shilaakoolobesha cakusangalala 13 paciindi Mwaami Lesa aakwisa mukulela cishi. Ulaakunoolela bamucishi ca panshi boonse cabululami alimwi mulushinisho. |
Lenje Bible with Deuterocanon © Bible Society of Zambia, 2003.
Bible Society of Zambia