Kulumbaisha 95 - Baibo Busansulushi Bwa Libuku Ili

Lwiimbo lwakulumbaisha

¹ Amwise twiimbile Mwaami Lesa cakusangalala, Atwiimbe cakoolobesha kuMwaandami utufuna.

² Atuye pameenso akwe akulumba, atwiimbe nyimbo shakulumbaisha akulisha shilimba.

³ Mukwiinga Mwaami Lesa ngoLesa wiindaawo, alimwi nguMwaami wiinda pabalesa boonse.

⁴ Ulalela cishi coonse ca panshi, kuswa panshi peene peene, kuya mukushika peculu lya tulundu tulaamfu.

⁵ Ulalela maanshi a mulweenge ayo ngaakalenga alimwi ulalela cishi coonse ncaakabumba mwiine.

⁶ Kamwisa tumulambile cakushisha shiwa panshi. Atufukame pameenso a Mwaami Lesa uyo wakatulenga,

⁷ mukwiinga lakwe nguLesa wesu. Swebo tuli bantu bakwe mbwaaembela anga nimbelele shili mumaansaakwe. Amunyumfwe liswi lyakwe Lesa sunu.

⁸ Mutabi beshicimpamya bweenka bwakacita bamashali banu bakulukulu kuMeliba, ee, bweenka mbobakacita abushiku bulya kuMasa muluyanga.

⁹ Uko bakanjelesha akunsunka, nacibi kwaamba ayi bakabona nshendakabacitila.

¹⁰ Ndakalinga kukalalite pabantu abo kwamyaaka makumi one. Ndakaamba ayi, “Aba bantu tabashomeki abuumbi! Bakaka kukonkela milawo yangu.”

¹¹ Ndakakalala akushomesha cakulumbila ayi, “Teshi mukenjileewo mucishi umo mondalinga kweelete kumupa kookesha.”