Kulumbaisha 94 - Baibo Busansulushi Bwa Libuku Ili

Lesa ngomoomboloshi wiindaawo

¹ NoBaami baLesa, ndimwe mupa milandu, amubooshe cishole kubamucita shibi.

² Amunyamuke noboomboloshi ba bantu boonse, amuboosheshe beshikulisumpula shintu nshebeelete.

³ NoBaami baLesa citooba ciindi cilaamfu buyani? Citooba ciindi cilaamfu buyani bamucita shibi kabakondwa?

⁴ Balaamba maswi akulisumpula cakutacilekaawo, bamucita shibi balalyuuma mushaamba lyoonse.

⁵ Balalyatoola bantu banu noBaami baLesa, ncakwiila balalyatilila bantu mbomwakasala.

⁶ Balacaya bamukalubinje abaswamashi, alimwi balacaya abana banshiwa.

⁷ Lyalo balaamba ayi, “Mwaami Lesa taatubooni, Lesa wakwe Jakobo taalashi.”

⁸ Amunyumfwe mwebo nomutacite maano nomuli pakati ka bantu bangu. Mwebo nobaluya, anu mulaakuba lili basongo?

⁹ Lesa wakatupa matwi, sa taakoonshi kunyumfwa? Lesa wakatupa meenso, sa taakoonshi kubona?

¹⁰ Ulakalalila mishobo, sa teshi akabape mulandu? Ngomufundishi wa bantu boonse, sa taacite lushibo?

¹¹ Mwaami Lesa ulishi miyeeyo ya bantu, ulishi kwaamba ayi miyeeyo yabo taaku mboibete.

¹² NoBaami baLesa ulicite coolwe uyo ngomupa milasho, ncakwiila uyo ngomwiisha milawo yanu yoonse.

¹³ Mulamupa kookesha kuswa kuciindi ca mapensho, kushikila cilindi cakabwa ayi bamucita shibi bawiteemo.

¹⁴ Mwaami Lesa teshi akafutatilewo bantu bakwe. Ee, teshi akalekeleshe abo mbwaakasala.

¹⁵ Bululami bulaakucanika munkuta alimwi. Baluleme boonse balaakubukonkela.

¹⁶ Ngani wakancafwa kulwana bamucita shibi? Ngani wakanjimikanina kubantu bacita bubi?

¹⁷ Mwaami Lesa naatakwe kuncafwa, naakwiinga nebo ndakafwabo kalekale.

¹⁸ Ndindakayeeya ayi, “Ono ndakoomwa,” Mwaami Lesa wakamfuna mulusuno lwakwe lutamaani.

¹⁹ Kulisukama ndikwakalinga kuncata, mwebo mwakanjumyayumya akunsangalasha.

²⁰ Sa inga mwacatana aboomboloshi babiibi abo boombolosha kuteelana amilawo?

²¹ Balacatana kwaamba ayi babishe baluleme, akupingula ayi batacite milandu bacaikwe.

²² Sombi Mwaami Lesa waba lilinga lyangu. Lesa wangu waba mwaandami umo moonjuba.

²³ Ulaakubapa mulandu ceebo ca shibiibi shabo, ulaakubanyonyoola ceebo ca bubi bwabo. Ee! Mwaami Lesa, Lesa wesu ulaakubanyonyoola.