Kulumbaisha 92 - Baibo Busansulushi Bwa Libuku Ili

Lwiimbo lwa kulumbaisha

Lwiimbo lwakulumbaisha pabushiku bwakookesha bwa Cibelu.

¹ NoBaami baLesa, ncibotu abuumbi kumulumbaisha akwiimba nyimbo shakumulemeka nobaLesa ba kwiculu Beendaawo.

² Ncibotu macuunsa kwaamba shalusuno lwanu lutamaani, lyalo mashiku kwaamba shakushomeka kwanu.

³ Ncakwiila ncibotu kumulumbaisha kwiinda mukulisha kalumbu ka mawaya likumi, akumulumbaisha mumukumo wa kalumbu.

⁴ NoBaami baLesa, milimo yanu ikankamika ilansangalasha. Ndeemba cakusangalala ceebo ca sheesho nshemucita.

⁵ Micito yanu njinene abuumbi, noBaami baLesa! Miyeeyo yanu noBaami baLesa, njiyumu kwishiba.

⁶ Utabete musongo taakoonshi kwishiba, ee, muluya taakoonshi kunyumfwishisha

⁷ ayi nabi bamucita shibi basumpuka calubilo bweenka bukula bwiisu, ee, nabi bacita shilubo boonse inga basumpuka, balaakunyonyoolwa cakumaninina.

⁸ Sombi mwebo noBaami baLesa, mulalemekwa kwalyoonse alyoonse.

⁹ NoBaami baLesa balwani banu ndushinisho balaakulobeshekwa. Bamucita shibi boonse balaakukomwa.

¹⁰ Sombi nebo mwanjuumya anga ninyati, mwananika mafuta abotu mukumpa bulemu.

¹¹ Ndalibonena ameenso angu kukomwa kwa baabo bampatite. Ndalinyumfwila amatwi angu kulila kwa balwani bangu babiibi.

¹² Ono baluleme balaswitilila bweenka tupukupuku mbotucata shisepo shiinji, balakula cakoololoka anga nshisamu sha sida sha kuLebanoni.

¹³ Bali anga nshisamu shishangitwe muŊanda ya Mwaami Lesa. Ncakwiila shilakula kabotu mulubansa lwa Ŋanda yakwe Lesa wesu.

¹⁴ Shilanoocicata shisepo nabi shacembela, shilaakunooshimpitebo aalo matewu alaakunoocilibo atontola.

¹⁵ Ici cilatondesha ayi Mwaami Lesa uliluleme, alimwi ayi taamu cibiibi mumwaandami wangu.