Kulumbaisha 91 - Baibo Busansulushi Bwa Libuku Ili

Lesa ndyeliyawo lyesu

¹ Uyo woonse ukala muli Lesa wa kwiculu Wiindaawo ayi afunwe, uyo woonse uyuba mucimfule cakwe Lesa Shinkusu shoonse,

² ulaakwaamba kuMwaami Lesa ayi, “Ndimwe bapulushi bangu, muli ndimwe moonjuba. Ndimwe baLesa bangu, muli ndimwe moocinkite manungo.”

³ Ulaakumufuna kuswa kushintu shiyoosha shishisitwe. Ncakwiila ulaakumufuna akumyaalu icaya.

⁴ Ulaakumufwekelela mumapapaminwa akwe, ee, mumapapaminwa akwe mweshi mukabe ciyubilo canu. Kushomeka kwakwe kulaakumutabilila anga ndiyawo nabi lubumbu lwa ndabala.

⁵ Utakaloondi kushintu shiyoosha sheenda mashiku, nabi mifwi iswa kubalwani bako malumwi.

⁶ Utaloondi myaalu isa mashiku, nabi shintu shiyoosha shicaya ciindi ca malumwi.

⁷ Kulubasu lwako bantu bali cuulu inga bacaikwa, ee, bali shuulu likumi inga bafwa apo mpoobete, sombi webo teshi ukacisikweewo napaceyuubo.

⁸ Webo ulaakunoolangabo meenso, akubona bamucita shibi kabapekwa mulandu.

⁹ Wakasala Mwaami Lesa ayi abe shikukufuna, ee, Lesa wa kwiculu Wiindaawo ayi abe liyawo lyako.

¹⁰ Aboobo taaku cintu ceshi cikakuciise, alimwi taaku cinyonyoola ceshi cikese paŋanda yako.

¹¹ Lyalo Lesa ulaakutuma baanjelo bakwe ayi bakakulaame, ncakwiila balaakunookutabilila koonse nkweshi ukaye.

¹² Balaakukulama mumaansaabo, kwaamba ayi utacisi cimpanta cako kulibwe.

¹³ Ulaakulyatoola nkalamu alimwi abafumbe. Ulaakulyatoola nkalamu shikali alimwi ansooka shicaya!

¹⁴ Mwaami Lesa utokwaamba ayi, “Ndaakupulushabo baabo bansuni, akufuna baabo bashoma muliina lyangu.”

¹⁵ Na bakasenge lucafwo ndaakubacafwa. Na bakabe mumapensho ndaakunooli abo. Ncakwiila ndaakubafuna akubalemeka.

¹⁶ Ndaakubapulusha akubapa buumi bulaamfu, ndaakubatondesha lupulusho lwangu.