Kulumbaisha 90 - Baibo Busansulushi Bwa Libuku Ili

LIBUKU LYANE (Kulu 90—106) Lesa amuntu

Mupailo wakwe Mose muntu wakwe Lesa.

¹ NoBaami baLesa, muli ndimwe motuyubila. Ncakwiila motuyubila mumashalane esu oonse.

² Tulundu kamutana kutulenga, ee, cishi kamutana kucibikaawo, mwebo muli baLesa kuswabo lili alili, alimwi munanoolibo baLesa kwamuyayaya.

³ Mwebo mulaboosha muntu mbwaakalinga, kumuboosha kubulongo nkwaakaswa.

⁴ Myaaka cuulu ili anga mbushiku bomwi pameenso anu. Ilaboneka anga mbushiku bweenda kale, nabi anga nciindi ciniini mashiku.

⁵ Muntu mulamutola lubilo mbuli mukuuku. Ulekalabo ciindi ciniini anga nciloto. Buumi bwakwe buli anga mbwiisu bumena macuunsa.

⁶ Bwiisu ncakwiila bulamena macuunsa, sombi macolesha bulanyana akuyuma.

⁷ Twapya kubukali bwanu buli anga ngumulilo. Mwatuloondesha ceebo cabukali bwanu buyoosha.

⁸ Mwabika shilubo nshetucite pameenso anu, shibiibi shesu shishisitwe mwashitula patuba kunembo lyanu.

⁹ Bukali bwanu bulafwiimpisha buumi bwesu. Ncakwiila buumi bwesu bulamanabo muciindi ciniini.

¹⁰ Tulipetwe myaaka makumi osanwe aobilo pano nsengwe, nabi myaaka makumi osanwe aotatwe na katucicite nkusu. Sombi ciindi ici nca mapenshobo akulila. Buumi buleela cakufwambaana, lyalo tulafwa.

¹¹ Anu ngani ushi nkusu sha bukali bwanu? Muntu uleendaawo kumuloonda na weshiba bukali bwanu mbobubete.

¹² Amutwiishe buumi bwesu mbobubete kufwiimpa. Ee, amutwiishe kwaamba ayi tube basongo.

¹³ Ino bukali bwanu butootola ciindi cilaamfu buyani? NoBaami baLesa, amube ankuumbu pabasebenshi banu!

¹⁴ Kulila bwaca, kamututondesha lusuno lwanu lutamaani kwaamba ayi tunokwiimba cakusangalala akukondwa lyoonse.

¹⁵ Amutusangalashe nshiku shiinji bweenka mbuli sheesho nshetwakalinga mumapensho. Ncakwiila nshiiku shiinji mbuli sheesho nshetwakalinga mumakatasho.

¹⁶ Amututondeshe milimo ikankamika sobasebenshi banu. Amusuminishe bamulunyungu lwesu kubona nkusu shanu sha bulemu.

¹⁷ Nobaami baLesa, baLesa besu nkumbu shanu shibe aswebo. Amutulengeshe kuswitilila mushintu shoonse nshetucita.