Kulumbaisha 9 - Baibo Busansulushi Bwa Libuku Ili

Kulumba Lesa ceebo cakoombolosha kwakwe kululeme

Kumutanjilili wa bwiimbi. Mumukumo wa lwiimbo lwakwe Defedi lwakwaamba ayi, “Kufwa kwa mwaana musankwa.”

¹ Ndaakumulumbaisha noBaami baLesa amoyo wangu woonse, ndaakushimikila shintu shikankamisha nshemwakacita.

² Ndaakwiimba cakusangalala ceebo ca ndimwe. Ndaakulumbaisha liina lyanu noBaami Beendaawo.

³ Balwani bangu ndibapilukila kwisule, balalifumpula akunyonyooka pameenso anu.

⁴ Ceebo moombolosha makani angu bweelete, mwekala pacuuna canu akoombolosha cabululami.

⁵ Ncakwiila mwakapa mulandu bakunsengwe, mwakanyonyoola bamucita shibi abo, aboobo mwalobya meenaabo kwamuyayaya.

⁶ Balwani besu bakanyonyoolwa cakumaninina, mandabalaabo mwakaanyonyoola akwaalobya, nkokwaamba ayi teshi bakeebalukwewo tubili.

⁷ Mwaami Lesa, nguMwaami wa lyoonse alyoonse, alimwi ulibambite kale cuuna cakwe ayi oomboloshe.

⁸ Ulalela cishi ca panshi cabululami akoombolosha mishobo yoonse bweelete.

⁹ Mwaami Lesa nciyubilo ca baabo balyatililwa, alimwi ndilinga lya mabwe muciindi ca mapensho.

¹⁰ Boonse abo beshi liina lyanu balamushoma, ceebo mwebo noBaami baLesa tamusuuli besa kuli ndimwe.

¹¹ Amulumbaishe Mwaami Lesa uyo ulela muSiyoni, mwaambe milimo yakwe ikankamika kumishobo yoonse.

¹² Mukwiinga Lesa ulabona bapenga, Taasuuli kulila kwa bali mumapensho, alimwi ulapa mulandu abo bababishisha.

¹³ NoBaami baLesa, amunyumfwile nkumbu. Amubone mbondapenga kubaabo bampatite. Amumfuune ayi mulyaango wa lufu utancalukili,

¹⁴ kwaamba ayi nkeemikane pameenso abene Jelusalemu akubalwiita shintu shoonse nshemulumbaishishaawo. Nebo ndaakusangalala mukwiinga mwebo mwakampulusha.

¹⁵ Mishobo yawita mucilindi nceyakalikabila, bacatwa kumyeendo mukoose nkobakateya beene.

¹⁶ Mwaami Lesa weshibwa ceebo cakoombolosha kwakwe kululeme. Amubone bamucita shibi bacatwa kumilimo njebacita amaansaabo.

¹⁷ Lufu nkokweela nshila ya bamucita shibi, njenshila ya baabo boonse bakaka Lesa.

¹⁸ Sombi bapenshi teshi bakalubweewo, sobwe. Kulangila kwa bakandu teshi kukamaninine.

¹⁹ Amunyamuke noBaami baLesa, mutalekeleli bantu kumukoma. Amulengeshe mishobo kwiimikana pameenso anu ayi boomboloshekwe.

²⁰ NoBaami baLesa amubalengeshe kuloonda akututuma. Amubalengeshe kwishiba ayi mbantubo mbuli bamwi boonse.