Kulumbaisha 89 - Baibo Busansulushi Bwa Libuku Ili

Lwiimbo lwa cishi muciindi ca mapensho

Lwiimbo lwiitwa ayi mashikili lwakwe Etani mwine Esila.

¹ NoBaami baLesa, lyoonse ndaakwiimba lusuno lwanu lutamaani, alimwi ndaakwaamba pakushomeka kwanu mumashalane oonse acisa.

² Ndaakwaamba ayi lusuno lwanu ndwalyoonse alyoonse, alimwi ayi kushomeka kwanu nkwamuyayaya anga bweenka bubete liculu.

³ Mwebo mwakaamba ayi, “Ndacita cipangano amuntu ngondakasala. Ndakashomesha cakulumbila kuli Defedi musebenshi wangu ayi,

⁴ ‘Bwaami bulaakwikalilila pabamulunyungu lwako. Ndaakulengesha ayi buleelo bwako bukabule kumana mumashalane oonse acisa.’ ”

⁵ NoBaami baLesa, bakwiculu balalumbaisha shaankamiko isho nshemucita, basalalite abo balalumbaisha kushomeka kwanu.

⁶ Taaku uli mwiculu weenga weelana amwebo noBaami baLesa, taaku cilengwa ca kwiculu cili coonse ceenga ceelana amwebo.

⁷ NobaLesa mulaloondwa abuumbi munkuta ya basalalite. Ncakwiila boonse abo balamulemeka noBaami baLesa.

⁸ NoBaami baLesa Beshinkusu shoonse, anu ngani uli anga ndimwe? Mwebo muli beshinkusu alimwi mulashomeka mushintu shoonse.

⁹ Ndimwe mweendelesha lweenge luyoosha, muloomusha maaba na kaapabooka.

¹⁰ Mwakalyatoola Laabu, shinshimwe wa mumaanshi ulya, bweenka bucitwa muntu utoofwa. Mwakapalanganya balwani banu alyaansa lyanu lyankusu.

¹¹ Liculu ndyanu ainshi ayalo njanu. Mwakalenga cishi ca panshi coonse asheesho shiliimo.

¹² Ndimwe mwakalenga kumalenge akumatwa. Kalundu ka Tabo aka Emoni tulamwiimbila cakusangalala.

¹³ Mukono wanu ngwa nkusu, ee, lyaansa lyanu ndiyumu. Lyaansa lyanu lyalulyo lilalumbaishikwa ceebo ca nkusu.

¹⁴ Bululami akoombolosha kwakutanyengelela shili anga ndwiimbi lwa cuuna ca bwaami bwanu. Lusuno lwanu lutamaani akushomeka shilaboneka mushoonse nshemucita.

¹⁵ Balicite coolwe abo bamulambila munyimbo. Balicite coolwe abo beenda mumumuni wa bulemu bwanu.

¹⁶ Balasangalala muliina lyanu bushiku boonse. Balamulumbaisha ceebo ca bululami bwanu.

¹⁷ Ndimwe mutupa bulemu ankusu, Munkumbu shanu tulaba ankusu lyoonsebo.

¹⁸ NoBaami baLesa liyawo lyesu lilaswa kuli ndimwe. Mwaami wesu ulaswa kuUsalalite wa bene Isilaeli.

Kushomesha kwakwe Lesa kuli defedi

¹⁹ Kalekale mwakaamba mucili anga nciloto kubantu banu bashomeka ayi, “Ndapa nkusu kuli shilumamba ushinkusu. Ndakamusala kuswa kubantu bangu akumusumpula.

²⁰ Ndabika Defedi musebenshi wangu pabwaami. Ndamunanika mafuta angu asalalite.

²¹ Lyaansa lyangu linanoomucafwa. Ncakwiila mukono wangu unanoomuyumyayumya.

²² Taaku mulwani wakwe weshi akamukoome. Taaku mucita shibi weshi akamulyatilile.

²³ Ndaakunyonyoola balwani bakwe pameenso akwe. Ndaakucaya bantu boonse bamupatite.

²⁴ Ndaakunoomusuni cakushomeka. Ndaakumupa nkusu shakunookoma lyoonsebo.

²⁵ Ndaakumulengesha kwaamba ayi alele cishi coonse kuswa kuLweenge lwa Mediteleniyani tibili akuMulonga Yufuletisi.

²⁶ Ulaakuŋambila ayi, ‘Ndimwe Bata, ndimwe baLesa bangu, mwaandami alimwi amupulushi wangu.’

²⁷ Anebo ndaakumucita ayi abe mwanaangu mutaanshi, ndaakumusumpula kwiinda baami bamwi ba pacishi ca panshi.

²⁸ Ndaakunoocita kweelana akushomesha kwangu lyoonse. Cipangano cangu anguwe teshi cikamaane.

²⁹ Bwaami bulaakwikalilila pabamulunyungu lwako. Buleelo bwako teshi bukamaane kushikila liculu likamaane.

³⁰ “Sombi na bana bakwe bakakake milawo yangu akukaka kukonkela nshendakaamba,

³¹ na bakakake nshila shangu akwaalilwa kukonkela milasho yangu,

³² ndaakubapa mulandu akuboomisha nkoli ceebo ca shibiibi shabo. Ndaakubapensha mukubakwipa amusako ceebo ca shilubo shabo.

³³ Sombi teshi nkakusheko moyo kuli Defedi, alimwi teshi nkacilekeewo kushomeka kuli nguwe.

³⁴ Teshi nkapwayewo cipangano cangu, nabi kubula kucita kweelana akushomesha kwangu kuli koonse.

³⁵ “Ntooshomesha cakulumbila ceebo ca liina lyangu lisalalite ayi nabi cikabe buyani teshi nkabeceewo kuli Defedi.

³⁶ Lunyungu lwakwe lulanooliikobo kwalyoonse alyoonse. Cuuna ca bwaami bwakwe cilaakukalilila pameenso angu, kulilabo lisuba kalicibala.

³⁷ Cilaakuba camuyayaya bweenka mbuli mweenshi, ee, kamboni ushomeka mwiculu ulya.”

Kulila ceebo cakukomwa kwakwe defedi

³⁸ Ono mwaami Defedi mwamukaka akumufutatila. Ee, usalitwe wanu uyo ngomwakananika mwafutatikila moyo.

³⁹ Mwakaka cipangano canu ncemwakapanga amusebenshi wanu. Mwabiika mushini wakwe wa bwaami mumatipa!

⁴⁰ Mwapwayoola muumbu shoonse sha ndabala yakwe, alimwi mwanyonyoola malinga oonse ayi abe matongo.

⁴¹ Boonse bantu batokwiinda bamusaala shintu shakwe. Beshikamukobonyina abalo kabamuseka.

⁴² Bantu bamupatite mwabapa nkusu shakumukoma. Mwalengesha balwani bakwe boonse kusangalala akukondwa.

⁴³ Mwalengesha mupeeni wakwe kubula ncito akumulekelesha ayi akomwe munkondo.

⁴⁴ Mwamunyaya nkooli yakwe ya bwaami, cuuna cakwe ca bulemu mwaciwisha panshi.

⁴⁵ Mwamulengesha kucembela bwangu, mwamufwalika nsoni anga ncakufwala.

Mupailo wakusenga kufunwa

⁴⁶ NoBaami baLesa, mutootola nciindi cilaamfu buyani kamulishisa? Ino citooba ciindi cilaamfu buyani bukali bwanu kabunyaka anga ngumulilo?

⁴⁷ Amwiibaluke buumi bwangu mbobubete kufwiimpa. Amwiibaluke swebo mbomwakatulenga ayi katufwa.

⁴⁸ Ino ngani weenga wabula kufwa? Ino ngani weenga walifuna kuya mucuumbwe?

⁴⁹ NoBaami baLesa lusuno lwanu luli kuli? Luli kuli lusuno ulo ndomwakashomesha Defedi?

⁵⁰ NoBaami baLesa, amwiibaluke nemusebenshi wanu mboonsekwa ee, mboondishishibisha kumatushi aswa kumishobo ya baswamashi.

⁵¹ NoBaami baLesa, balwani banu batootukana mwaami ngomwakasala. Balamutukana kuli koonse nkweenga waya!

⁵² Mwaami Lesa alumbaishikwe lyoonse alyoonse! Ameni! Ameni!