Kulumbaisha 88 - Baibo Busansulushi Bwa Libuku Ili

Kulila lucafwo

Lwiimbo lwa bana bakwe Kola. Kumutanjilili wa bwiimbi. Kwiimba kweelana aMaalati Leyanoti. Lwiimbo lwiitwa ayi mashikili akwe Emani mwine Esila.

¹ NoBaami baLesa noBapulushi besu, malumwi amashiku ndalilila pameenso anu.

² Amunyumfwe mupailo wangu, amukutike kusenga lucafwo kwangu.

³ Buumi bwangu bwesula mapensho, cakwaamba ayi ndi pafwaafwi akufwa.

⁴ Nebo ndi anga mbamwi boonse bali pafwaafwi kufwa, ndaba anga ngumuntu utacite nkusu.

⁵ Ndalekelwa pakati ka bafu, ndi anga mbantu bacaikwa abo batolwa kushuumbwe shabo, abo mwebo mbweshi mukabule kwiibaluka. Ee, anga mbantu mbomwacileka kucafwa.

⁶ Mwakambika panshi peene mucuumbwe, ee, mucilindi cilaamfu muli munshinshe ushiya mbi.

⁷ Bukali bwanu bwawita pali ndime, bwamfwekelesha anga ngamaaba a mulweenge.

⁸ Mwalengesha beensuma kunsuula, ndaba cintu cilensha bunya kuli mbabo. Ndi anga ngumukaili utakoonshi kuloboka.

⁹ NoBaami baLesa, meenso angu ashimba ceebo ca buumba. Bushiku abushiku ndalilila kuli ndimwe. Ndatambika maansaangu kuli ndimwe pakupaila.

¹⁰ Sa mulacita shaankamiko kubafu? Sa bafwite balabuka ayi bamulumbaishe?

¹¹ Sa lusuno lwanu lutamaani lulaambwa amucuumbwe? Sa kushomeka kwanu kulaambwa mumusena wakunyonyookelaamo?

¹² Sa shaankamiko shanu shilaboneka kumusena wa munshinshe? Sa bubotu bwanu bulacanwa amwikala bantu mbomwakalubaako?

¹³ NoBaami baLesa, nebo ntoolilila lucafwo kuswa kuli ndimwe. Macuunsa lyoonse ndapaila kuli ndimwe.

¹⁴ NoBaami baLesa, ceebonshi mulankaka akushisa ciwa canu kuli ndime?

¹⁵ Kuswa kubwanike bwangu ndapenshekwa akuba pafwaafwi alufu. Mwebo mwacita shintu shiyoosha kuli ndime aboobo nkusu shangu shamana kubuumba.

¹⁶ Bukali bwanu bwantyoloola cakwaana. Shiyoosha nshemucita shanyonyoola.

¹⁷ Shiyoosha shilanshinguluka anga ngamaaba lilaya mukwipila, Ncakwiila shambika pakati!

¹⁸ Mwantalamushisha beensuma abamakwesu. Munshinshe ushiya mbi ngomweensuma weenkabo wacalaawo.