Kulumbaisha 86 - Baibo Busansulushi Bwa Libuku Ili

Mupailo wakusenga lucafwo

Lwiimbo lwakwe Defedi.

¹ NoBaami baLesa, amuteye kutwi akunkumbula, mukwiinga ndi mukandu alimwi taaku mboombete.

² Amulame buumi bwangu mukwiinga ndashomeka kuli ndimwe. Mwebo muli baLesa bangu, amumpulushe nemusebenshi wanu mukwiinga ndicinkite manungo muli ndimwe.

³ Amunyumfwileko nkumbu noBaami baLesa, mukwiinga ndapaila kuli ndimwe ciindi coonse.

⁴ Amulete kusangalala kuli ndime nemusebenshi wanu mukwiinga ndapaila cankusu kuli ndimwe.

⁵ NoBaami baLesa, mulicite nkumbu alimwi mulatulekelela. Lusuno lwanu ndunene kubantu abo bapaila kuli ndimwe.

⁶ Amunyumfwe kusenga kwangu noBaami baLesa, amunyumfwe kulila kwangu kwakusenga lucafwo.

⁷ Na ndaba mumapensho ndalilila kuli ndimwe, ceebo mulanyumfwa mipailo yangu.

⁸ NoBaami baLesa, taaku uli mbuli ndimwe pakati ka balesa bamwi boonse. Taaku ukonsha kucita shankamiko nshemucita.

⁹ NoBaami baLesa, mishobo yoonse njemwakalenga ilaakwisa mukumufukamina, alimwi balaakulumbaisha bulemu bwa liina lyanu.

¹⁰ Mukwiinga mulicite nkusu alimwi mulacita shikankamika. Ncakwiila mwebo nweenka ndimwe baLesa.

¹¹ NoBaami baLesa amunjiishe mboonjelete kweenda, kwaamba ayi nkanokweenda mulushinisho lwanu. Amunjiishe kumusebensela amoyo wangu woonse, kwaamba ayi noolemeka liina lyanu.

¹² NoBaami baLesa nobaLesa bangu, ndaakumulumbaisha amoyo wangu woonse. Ndaakwaambilisha bulemu bwanu kwamuyayaya.

¹³ Lusuno lwanu lutamaani ndunene. Mwakamfuna ayi ntayi kumusena wa bafu.

¹⁴ Bantu beshikulisumpula batoondwana nobaLesa. Likoto lya bantu beshilunkutwe balisuni kuncaya. Ncakwiila abo mbantu batashomi muli ndimwe.

¹⁵ Sombi mwebo nobaLesa, muliswite nkumbu aluse, tamukalali bwaangu, mulicite lusuno lutamaani alimwi mulashomeka.

¹⁶ Amunangilishe akunyumfwila nkumbu. Amumpe nkusu nebo nemusebenshi wanu akumfuna nebo nemwaana wa musebenshi wanu mwanakashi.

¹⁷ Amuntondeshe cishibisho ca bubotu bwanu, kwaamba ayi balwani bangu baciboone akunyumfwa nsoni. Ceebo mwebo noBaami baLesa mwakancafwa akunkalika moyo.