Kulumbaisha 85 - Baibo Busansulushi Bwa Libuku Ili

Mupailo wakusenga luumuno mucishi

Kumutanjilili wa bwiimbi. Lwiimbo lwa bana bakwe Kola.

¹ NoBaami baLesa, mwakapa coolwe cishi canu, Mwakalengesha bamulunyungu lwakwe Jakobo kuswitilila alimwi.

² Mwakalekelela milandu ya bantu banu, Mwakashiminganya shibiibi shoonse.

³ Mwakashisa bukali bwanu boonse Mwakakasha bukali bwanu bwiindaawo.

⁴ NobaLesa Bapulushi besu, amutubooshele bwikaalo bwesu butaanshi. Bukali bwanu pali ndiswe abumane.

⁵ Sa munanookalalitebo kwalyoonse alyoonse? Sa bukali bwanu bunanooyabo tibili akumashalane?

⁶ Sa teshi mukatubooshele bwikaalo bwesu butaanshi kwaamba ayi bantu banu bakasangalale alimwi?

⁷ NoBaami baLesa, amutuboneshe lusuno lwanu lutamaani, alimwi amutupe lucafwo lwa lupulusho lwanu.

⁸ Ndaakukutika kusheesho Mwaami Lesa nsheshi akaambe. Ulashomesha luumuno kuli ndiswe sobantu bakwe, kulilabo na twabula kuboolela kunshila shesu shabuluya.

⁹ Ncakwiila Lesa ulilibambite kupulusha bantu bamulemeka, kwaamba ayi bulemu bwakwe bwikale mucishi cesu.

¹⁰ Lusuno akushomeka shilakumana, bululami aluumuno shilakumbatana.

¹¹ Kushomeka kwa bantu kulaboneka pacishi ca panshi, sombi bululami bwakwe Lesa bulaswa kwiculu.

¹² Mwaami Lesa ulaakutupa shintu shibotu. Ncakwiila cishi cesu cilaakucata shishango shiinji.

¹³ Bululami bulaakutanjila kunembo lya Mwaami Lesa, akubamba nshila yakwe ayi eendeemo.