Kulumbaisha 84 - Baibo Busansulushi Bwa Libuku Ili

Lwiimbo lwapakwinjila muŋanda yakwe Lesa

Kumutanjilili wa bwiimbi. Mumukumo wa “Gititi.” Lwiimbo lwa bana bakwe Kola.

¹ NoBaami baLesa Beshinkusu shoonse Ŋanda yanu njibotu abuumbi.

² Moyo wangu ulisuni kushikaamo umo! Ntooyandishisha kwinjila muŊanda ya Mwaami Lesa. Ntoomwiimbila cakusangalala abuumi bwangu boonse, kwiimbila ndimwe nobaLesa boomi.

³ Tuntiinga atwalo twapanga shinswa sha ntuto. Atwalo tumimbya twaliyakila mwakoona umo mwakukonkweta twaana. Twayakila kufwaafwi ashipaililo shanu, noBaami baLesa beShinkusu shoonse, ndimwe Baami bangu, baLesa bangu.

⁴ Balicite coolwe abo bekala muŊanda yanu, akumwiimbila nyimbo shakulumbaisha.

⁵ Balicite coolwe abo bapekwa nkusu kuswa kuli ndimwe, ababo batooyanda kuya mukushika kuKalundu ka Siyoni.

⁶ Pakwiinda mucinyika ciyumu ca Baka balo balalengesha ayi cishi ico cibe atuntupu. Ncakwiila mfuula ya miyoba ilesusha tushiba toonse.

⁷ Nkusu shabo shilaya cifulilaako ndibaya ceenda, tibili bakabonekele pameenso akwe Lesa wa balesa boonse muSiyoni.

⁸ Amunyumfwe mupailo wangu noBaami baLesa Beshinkusu shoonse. Amukutike kusenga kwangu nobaLesa bakwe Jakobo.

⁹ Amubone liyawo lyesu, nobaLesa. Amunyumfwile nkumbu uyo ngomwakasala kuba mwaami!

¹⁰ Kwikala bushiku bomwi muŊanda yanu, kuleenda kwikala kumwi nshiku shili cuulu. Inga cambotela kuba shikulindilila mulyango wa Ŋanda yanu, kwiinda kwikala mumaanda a bamucita shibi.

¹¹ NoBaami baLesa muli anga ndisuba alimwi anga ndiyawo lyesu. Mulatupa coolwe mukutunyumfwila nkumbu akutupa bulemu. Mwebo tamukaki kupa shintu shibotu kubaabo bacita shiluleme.

¹² NoBaami baLesa Beshinkusu shoonse, balicite coolwe abo bacinkite manungo muli ndimwe.