Kulumbaisha 83 - Baibo Busansulushi Bwa Libuku Ili

Mupailo wakusenga kukoma balwani

Lwiimbo lwakwe Asafu.

¹ NobaLesa, mutakutumanibo, mutoomunibo tontolo sobwe, alimwi mutanoolangilishabo.

² Amubone balwani banu mbobamubukila. Amubone bamupatite mbobamwaashukila.

³ Batoopangana miyeeyo ya bushishi ayi balwane bantu banu. Batoopinga baabo mbomutabilila.

⁴ Batokwaamba ayi, “Tunyonyoole mushobo wabo, kwaamba ayi liina lya Isilaeli litakanyumfwiki tubili.”

⁵ Balasuminishanya pamuyeeyo wabo akucatana pantu pomwi ayi bamulwaane,

⁶ Balwani abo mbene Edomu, bene Ishimaeli, bene Moabu bene Aga,

⁷ bene Gebali, bene Amoni, bene Amaleki, bene Filisiti abantu ba kuTaya.

⁸ Bene Asilya abalo balabaako lubasu ayi balwanine pantu pomwi abamulunyungu lwakwe Loti.

⁹ Amubacite mbomwakacita bene Midyani, ee, bweenka mbomwakacita Sisela aJabini kuMulonga wa Kishoni.

¹⁰ Bamaami abo mwakabalobya muEndoli, mituntu yabo yakabola pabulongo.

¹¹ Bantu babo balemekwa amubacite anga nguOlebu aSeeba. Amukome baleli babo mbuli mbomwakakoma Seba aSalumuna,

¹² abo bakaamba ayi, “Atubwese cishi, ee, cishi cakwe Lesa ayi cibe ceesu.”

¹³ NobaLesa, amubalengeshe kuba anga ndusuko, ncakwiila anga buungu buululuka kumuuwo.

¹⁴ Bweenka mulilo mbootenta luundu, bweenka mulilo utoobilima mboobilimya tulundu,

¹⁵ mbweeke ubo amubatandaanye acipuupu canu cinene, amubalengeshe boowa akapupuulwa kanu.

¹⁶ NoBaami baLesa, amubalengeshe kufwa nsoni, kwaamba ayi beshibe nkusu shanu shikankamika.

¹⁷ Ncakwiila amulenshe nsoni akufulungana. Ee, abalobelele mumusebaanyo wabo beene.

¹⁸ Abeshibe ayi ndimwe nomucite liina lya Mwaami Lesa, ndimwe nweenka nobaLesa ba kwiculu Beendaawo mucishi coonse ca panshi.