Kulumbaisha 81 - Baibo Busansulushi Bwa Libuku Ili

Lwiimbo lwa pakusekelela

Kumutanjilili wa bwiimbi. Mumukumo wa “Gititi.” Lwiimbo lwakwe Asafu.

¹ Amwiimbe cakusangalala kuli Lesa shinkusu wesu, amoolobeshe cakulumbaisha kuli Lesa wakwe Jakobo.

² Amutalike lwiimbo akulisha misebe, amulishe tulumbu tuniini atunene.

³ Amulishe lupeenga lwa lwiica lwa mbelele isankwa, paciindi mweenshi ndyeubala, alimwi andyeukoma pabushiku bwakusekelela kwesu.

⁴ Uyu ngomulawo wa bene Isilaeli, ngomulasho wakapa Lesa wakwe Jakobo.

⁵ Wakapa mulasho uyu kubene Isilaeli ciindi ico ndyaakalwana bene Ijipiti. Ndakanyumfwa liswi litashibikitwe ayi,

⁶ “Ndime ndamutula mikuli kuswa pashifushi shanu. Maansaanu ndakaakusha kumitaanga ya ncelwa.

⁷ Ndimwakalinga mumapensho mwakandilila, lyalo ndakamufuna. Ndakamukumbula kaandi mumakumbi a mfula. Ndakamweelesha kumaanshi a kuMeliba.

⁸ Ono amunyumfwe, nobantu bangu, nshentoomucenjesha. Mwebo nobene Isilaeli ndamusenga ayi munyumfwile.

⁹ Mutakabi alesa umwi pakati kanu. Mutalambili lesa wa baswamashi.

¹⁰ Ndime Mwaami Lesa, Lesa wanu nendakamukusha mucishi ca Ijipiti. Amulakame nebo ndaakumulisha.

¹¹ “Sombi bantu bangu tabakwe kunkutika. Ncakwiila bene Isilaeli tabakwe kunyumfwila.

¹² Lyalo ndakabaleka acimpamya cabo. Ndakabaleka ayi bakonkele nshila shabo.

¹³ Nobantu bangu, nimwankutika, nobene Isilaeli nimwanyumfwila,

¹⁴ naakwiinga ndakooma balwani banu cakufwambaana ee, naakwiinga ndakooma boonse bamupatite.

¹⁵ Uyo woonse umpatite inga wafukama caboowa pameenso angu. Mulandu wabo inga watolelela kwalyoonse alyoonse.

¹⁶ Sombi mwebo inga ndamulisha shinkwa ubotu abuumbi. Ee, inga ndamulisha buuci buswa mumwaandami kushikila mukakute.”