Kulumbaisha 80 - Baibo Busansulushi Bwa Libuku Ili

Mupailo wakusenga kubooshelwa bwikaalo butaanshi

Kumutanjilili wa bwiimbi. Mumukumo wa “Maluba a Cipangano.” Lwiimbo lwakwe Asafu.

¹ Amutukutike noBeembeshi ba bene Isilaeli, nomutanjilila bene Isilaeli anga nimbelele. Ee, mwebo nomwikala pakati ka bakelebu,

² amuliyubulule kumukowa wakwe Efuleemu, Benjameni awakwe Manase. Amutuboneshe nkusu shanu, amwise kwaamba ayi mutupulushe.

³ NobaLesa, amutuboosheshe bwikaalo bwesu butaanshi! Amutunyumfwile nkumbu kwaamba ayi tupulushikwe.

⁴ NoBaami baLesa Beshinkusu shoonse, citooba ciindi cilaamfu buyani mipailo ya bantu banu keemukalasha?

⁵ Buumba caba ncecakulya ncemubapa, minsonshi yaba ngomaanshi akunwa ngomubapeta munkomeshi inene.

⁶ Mwakasuminisha batushingulukite kulwanina cishi cesu. Bulya balwani besu balatucelebula.

⁷ NobaLesa Beshinkusu shoonse, amutuboosheshe bwikaalo bwesu butaanshi! Amutunyumfwile nkumbu kwaamba ayi tupulushikwe.

⁸ Mwakatumuna bene Isilaeli mucishi ca Ijipiti anga ngumunyansa. Mwakatandaanya mishobo imwi muno kwaamba ayi mushangemo mbabo.

⁹ Mwakabotesha musena wabo kwaamba ayi bamene miyanda. Bakashimpa alimwi akupansa cakukwana cishi coonse cino.

¹⁰ Bene Isilaeli bakafula akumwaika kuya mukushika akutulundu. Bamulunyungu lwabo bakapansa cakushika akushisamu shinene sha sida.

¹¹ Bakapansa kuswa kuMediteleniyani, kuya mukushika akuMulonga wa Yufuletisi.

¹² Ino nceeboonshi ncemwamwaila malinga abo akulengesha buboni bwabo kubula mwiine?

¹³ Bakunsengwe banyonyoola cishi cabo. Ncakwiila baswamashi basaala bubile bwabo.

¹⁴ NobaLesa Beshinkusu, amusanduluke akulanga kuli ndiswe. Amutulangilishe mwebo nomwikala kwiculu. Amwise mupulushe bantu banu bene Isilaeli.

¹⁵ Kamwisa mupulushe bantu aba mbomwakaleta mucishi cino. Ndimwe mwakabalengesha ayi bashimpe akumena miyanda.

¹⁶ Balwani babo bamana babanyonyoola, Amubalangilishe cabukali akubacaya.

¹⁷ Amubambe akulama bantu abo mbomwakasala, ee, mushobo uyo ngomwakapa nkusu abuumbi.

¹⁸ Lyalo teshi tukamufutatilewo tubili. Amutupe buumi bupya, tunanoomulumbaisha.

¹⁹ NoBaami baLesa Beshinkusu shoonse, amutuboosheshe bwikaalo bwesu butaanshi! Amutunyumfwile nkumbu kwaamba ayi tupulushikwe.