Kulumbaisha 79 - Baibo Busansulushi Bwa Libuku Ili

Mupailo wa mushobo uli mumapensho

Lwiimbo lwakwe Asafu.

¹ NobaLesa, baswamashi batulwana mucishi canu, babisha Ŋanda yanu Isalalite. Banyonyoola ndabala ya Jelusalemu.

² Baaba mibili ya basebenshi banu kumakubi, mibili ya bantu banu basalalite kubanyama bamuluundu.

³ Batila bulowa anga ngamaanshi kushinguluka Jelusalemu, taaku wakacaala kwaamba ayi abike mubye.

⁴ Mishobo itushingulukite yatusebaanya cakumaninina. Bantu ba mishobo imwi batuseka alimwi akutucelebula.

⁵ NoBaami baLesa, sa munanookalalitebo kwalyoonse alyoonse? Citooba ciindi cilaamfu buyani busuba bwanu kabunyaka anga ngumulilo?

⁶ Amukalalile mishobo iyo itamulambili, ee, malelo ayo atapaili kuli ndimwe.

⁷ Ceebo bakalobya bamulunyungu lwakwe Jakobo. Ncakwiila bakanyonyoola cishi cabo.

⁸ Mutatupi milandu ceebo ca shibiibi shakacita bamashali besu bakulukulu. Amutunyumfwile nkumbu cakutacelwa. Twabula mbotucita pacikani ici.

⁹ NobaLesa nobapulushi besu, amutucaafwe ceebo ca bulemu bwa liina lyanu. Amutufuune akutulekelela shibiibi shesu ceebo ca liina lyanu.

¹⁰ Ceebonshi mishobo imwi ilyeelete kwaamba ayi, “Lesa wabo uli kuli?” Katulangilisha, amulengeshe mishobo iyi kwishiba ayi mulaboosha cishole pakutila bulowa bwa basebenshi banu.

¹¹ Amunyumfwe kutongela kwa bantu bali muntolongo. Amwaangulule bantu bapekwa mulandu wakufwa alyaansa lyanu lyalulyo.

¹² Amuboosheshe mishobo imwi shishole mankanda osanwe aobilo, ceebo ca matushi ngobakalinga kumutukana noBaami baLesa.

¹³ Lyalo swebo sobana banu sombelele sha mulitanga lyanu tunanoomulumba lyoonsebo. Kuswa kulishalane tibili akulishalane limwi tunanoomulumbaisha lyoonse alyoonse.