Kulumbaisha 78 - Baibo Busansulushi Bwa Libuku Ili

Lesa abantu bakwe

Lwiimbo lwakwe Asafu lwiitwa mashikili.

¹ Nobantu bangu, amunyumfwe kwiisha kwangu. Amunyumfwishe makani ngweshi ŋambe.

² Ndaakumulwiita shikoshanyo. Ndaakumusansulwita shintu shishisitwe shikulukulu,

³ shintu isho nshetwakanyumfwa akubona, ee, shintu isho nshebakatulwiita bamashali besu bakulukulu.

⁴ Teshi tukashishiseewo kubana besu. Tulaakulwiita lishalane litoosa pankusu sha Mwaami Lesa amilimo yakwe ya nkusu, kubikaawo ashaankamiko isho nshaakacita.

⁵ Wakapa milasho kubamuluyungu lwakwe Jakobo. Wakapa milawo kubene Isilaeli. Wakalwiita bamashali besu bakulukulu ayi banokwiisha bana babo milawo iyo.

⁶ Munshila iyo lishalane litoosa alyalo likeeye, ee, bana abo batana kushalwa, alimwi abalo bakeeishe bana babo.

⁷ Aboobo balaakucinka manungo muli Lesa, alimwi teshi bakalubeeko milimo yakwe, sombi balaakukonkela milawo yakwe.

⁸ Teshi bakabe anga mbamashali babo bakulukulu, abo beshicimpamya alimwi lishalane lyaashu, abo batakalinga kucinkite manungo muli Lesa cakushinisha, ncakwiila batakalinga kucite myoyo ishomeka kuli nguwe.

⁹ Bene Efuleemu nabi bakalinga kupakete mata amifwi, bakacica kuboowa pabushiku bwa kulwana.

¹⁰ Tabakwe kulama cipangano cakwe Lesa, bakakaka kukonkela milawo yakwe.

¹¹ Bakaluba shoonse nshaakabacitila, shaankamiko nshaakacita mumeenso abo.

¹² Wacita shaankamiko mumeenso a bamashali babo bakulukulu, mucishi ca Ijipiti mucituunta ca Sowani.

¹³ Wakapansaanya lweenge akubasubusha, wakalengesha maanshi kwiimikana anga ndubumbu.

¹⁴ Malumwi wakalinga kubatanjilila alikumbi, mashiku wakabatanjilila amumuni wa mulilo.

¹⁵ Wakapwaya myaandami muluyanga, akubapa maanshi maanji ali anga nga mulweenge.

¹⁶ Wakalengesha tulonga kuswa mumyaansha ya mwaandami, akulengesha maanshi kukunka anga ngumulonga.

¹⁷ Sombi bakatolelela kubishisha Lesa, muluyanga bakabukila Lesa wa kwiculu Wiindaawo.

¹⁸ Bakasunka Lesa cakashanga, mukusenga shakulya nshebakalinga kusuni.

¹⁹ Bakalyamboosha kuli Lesa ayi, “Sa Lesa inga watupa cakulya muluyanga muno?

²⁰ Ndyaakooma pamwaandami maanshi akaswa, alimwi tulonga twakakunka abuumbi. Ono sa inga watupa cakulya bulya? Sa inga watupa anyama sobantu bakwe?”

²¹ Lesa ndyaakabanyumfwa, wakakalala abuumbi. Mulilo wakanyakila bamulunyungu lwakwe Jakobo, ncakwiila bukali bwakwe bwakafula pabene Isilaeli.

²² Shakacitika mukwiinga tabakwe kumushoma nabi kucinka manungo mulupulusho lwakwe.

²³ Sombi lakwe wakapa mulasho kuliculu, akucalula shisasa sha kwiculu.

²⁴ Wakalosha mana ayi bantu balye, wakabapa shakulya shakaswa kwiculu.

²⁵ Bantu bakalya shinkwa wa baanjelo. Lesa wakabapa shakulya shoonse nshebakalinga kusuni.

²⁶ Wakalengesha muuwo wa kwicwe kupuupa, munkusu shakwe wakaleta muuwo kuswa kumalenge.

²⁷ Wakalosha nyama anga ndusuko, ee, bayuni baanji anga ngumuseese wa kuloombe lwa lweenge.

²⁸ Wakalengesha bayuni abo kwisa pamisumba yabo, akwikala kushinguluka matente abo.

²⁹ Ncakwiila bantu abo bakalya cakulilemena, Lesa wakabapa isho nshebakalinga kusuni.

³⁰ Kabatana kushimana kulya isho nshebakayewa, paciindi kashicili mumilomo yabo,

³¹ Lesa wakabakalalila abuumbi akucaya bantu bakalinga kushimpite. Wakanyonyoola basankwa bene Isilaeli bacikula bwangu.

³² Nakubi kwaamba ayi shoonse ishi shakacitika, bantu bakatolelela kubisha. Ncakwiila nakubi kwaamba ayi shaankamiko shakacitwa tabakwe kucinka manungo muli nguwe.

³³ Lyalo wakabatimbwita nshiku sha buumi bwabo cakubula mpindu. Wakabatimbwita myaaka yabo mukunyonyoolwa cakutengashila.

³⁴ Ono kulilabo na wacaya bamwi, beenga bacalaawo bakalinga kusandukila kuli nguwe akumulambila.

³⁵ Bakeebaluka ayi Lesa nguMwaandami wabo, ayi Lesa wa kwiculu Wiindaawo nguMupulushi wabo.

³⁶ Sombi balo bakalinga kumulambilabo pamilomo, bakalingabo kumubeca mukwaamba kwabo.

³⁷ Tebakalinga kushomeka kuli nguwe, tebakalinga kushomeka kweelana acipangano cakwe.

³⁸ Nakubi boobo lakwe wakalinga kubanyumfwila nkumbu, wakabalekelela shibiibi shabo alimwi taakwe kubanyonyoola. Liinji liinji wakalinga kukomenya moyo kwaamba ayi atabi abukali bwakubacaya.

³⁹ Lakwe Lesa wakayeeya ayi mbantubo abo, balibo anga nkapupuulwa ako katabooleli.

⁴⁰ Ndibakalinga muluyanga liinji liinji bakalinga kumubukila. Ncakwiila bakalinga kumulengesha kuungumana mumusena uyo utacite ncito.

⁴¹ Lyobilo lyobilo bakalinga kusunka Lesa, akulengesha Lesa usalalite wa bene Isilaeli kukalala.

⁴² Bakaluba nkusu shakwe mboshibete ambwaakabafuna kuswa kubalwani babo.

⁴³ Bakaluba shaankamiko isho Lesa nshaakababonesha mucishi ca Ijipiti, ee, shitondesho sha nkusu sha kwiculu shakacitwa mucituunta ca Sowani.

⁴⁴ Wakasandula maanshi a mumilonga ya Ijipiti kuba bulowa. Lyalo tekwakalinga muntu nabi womwi wakakonsha kunwa maanshi a mumilonga iyo.

⁴⁵ Wakabatumina baloonshi baanji abuumbi ayi banoobapensha, akubatumina babombwe baanji mukunyonyoola cishi cabo.

⁴⁶ Lesa wakatuma nsoshi ayi shilye shishango shabo. Wakatuma cisoshi ayi cinyonyoole myuunda yabo.

⁴⁷ Wakanyonyoola minyansa yabo amfuula ya mabwe. Ashalo shisamu sha mikuyu shakoomwa caandwa.

⁴⁸ Alimwi wakacaya ŋombe shabo amfuula ya mabwe, ashifubwa shabo shimwi kutulumba.

⁴⁹ Lesa wakabatondesha bukali buyoosha, bukali bumwibo, kufutatika moyo alupato isho shakesa pali mbabo anga ndikoto lya baanjelo beshikunyonyoola.

⁵⁰ Taakwe kucata bukali bwakwe. Taakwe kubalekelela, sombi wakabacaya kumwaalu.

⁵¹ Wakacaya baana bakwiiya boonse ba bene Ijipiti. Ee, wakacaya baana bakwiiya mumatente a bene Amu.

⁵² Lyalo wakakusha bantu bakwe anga ngumweembeshi, akubatanjilila muluyanga anga nimbelele.

⁵³ Wakabatanjilila kabotu cakwaamba ayi boowa bwakamana, sombi balwani babo lweenge lwakesa lwabafwekelesha boonse.

⁵⁴ Wakabashisha kumanyinsa a cishi cakwe cisalalite. Wakabashisha kukalundu ako nkaakakoma mwiine.

⁵⁵ Wakatandaanya mishobo imwi kunembo lyabo. Lyalo wakapa bene Isilaeli cishi ayi ncabo, ee, mucishi cabo wakakalikaamo bene Isilaeli.

⁵⁶ Sombi bantu bakasunka Lesa, bakaashukila Lesa wa kwiculu Wiindaawo, ncakwiila bakakaka kukonkela milawo yakwe.

⁵⁷ Tebakalinga kushomeka mbuli bamashali babo bakulukulu. Tebakalinga kushomeka bweenka mufwi usendeme mbootashomeki.

⁵⁸ Bakakalasha Lesa ceebo ca misena yakulambililaamo balesa ba baswamashi. Bakamulengesha kufutatika moyo ceebo ca shibumbwabumbwa shabo.

⁵⁹ Ono Lesa ndyaakabona shintu ishi shoonse wakakalala abuumbi. Lyalo wakakaka mushobo wa bene Isilaeli cakumaninina.

⁶⁰ Wakashiya tente yakwe kuShilo, iyo njaakalinga kwikalaamo pakati ka bantu bakwe.

⁶¹ Lyalo wakasuminisha balwani babo kwaamba ayi babwese Libokoshi lya Cipangano cakwe ilyo lyakalinga citondesho ca nkusu abulemu bwakwe mwiine.

⁶² Wakaaba bantu bakwe kwaamba ayi bacaikwe amipeeni. Ncakwiila wakakalala abuumbi abantu bakwe mbwaakasala.

⁶³ Boonse basankwa bacikula bwangu bakamana kumipeeni, aboobo balutundu bacikula bwangu bakacaalabo kwakubula ubeeba.

⁶⁴ Bapailishi babo bakabacaya amipeeni, bamukalubinje babo bakabakasha kulila.

⁶⁵ Lyalo Lesa wakabuka anga ngumuntu walinga kulete, alimwi anga ngumuntu wakolwa waini ukali.

⁶⁶ Wakatandaanya balwani bakwe. Wakabalensha nsoni shitamaani.

⁶⁷ Wakakaka bamulunyungu lwakwe Josefu, alimwi taakwe kusala mukowa wa bene Efuleemu.

⁶⁸ Sombi wakasala mukowa wa bene Juda, alimwi wakasala Kalundu ka Siyoni ako nkaakalinga kusuni.

⁶⁹ Wakayaka Ŋanda yakwe isalalite, mbuli tulundu tulaamfu, mbuli cishi ncaakalenga camuyayaya.

⁷⁰ Wakasala Defedi musebenshi wakwe. Wakamukusha mubweembeshi bwa mbelele.

⁷¹ Wakamubwesa nkwaakalinga kweembela mbelele akumubika ayi abe mweembeshi wa bamulunyungu lwakwe Jakobo. Wakaba mweembeshi wa bantu bakwe bene Isilaeli.

⁷² Lyalo Defedi wakabeembela ca moyo womwi, akubatanjilila abweendeleshi bwakwe bwa busongo.