Kulumbaisha 77 - Baibo Busansulushi Bwa Libuku Ili

Paciindi ca mapensho Lesa uli abantu bakwe

Kumutanjilili wa bwiimbi. Kuli Jedutuni. Lwiimbo lwakwe Asafu.

¹ Ndakalilila kuli Lesa ayi ancaafwe. Ndakalilila Lesa ayi amfuune.

² Ndindakalinga mumapensho ndakapaila kuMwaami Lesa. Ciindi ca mashiku ndakatambika maansaangu pakupaila, sombi nshina kucana kukalikwa moyo.

³ Ndinjeya Lesa ndapenga mumoyo wangu, ndinjibaluka Lesa moyo wangu uloongumana abuumbi.

⁴ Wakanengesha kuba acilabila. Ndakaalilwa akwaamba ceebo ca buumba.

⁵ Ndakayeeya nshiku shakeenda. Ndakayeeya myaaka ya kalekale.

⁶ Ndakatola ciindi kuyeeya mashiku. Ndakayeeya akuliipusha ayi,

⁷ “Sa Mwaami Lesa watufutatililabo limwi? Sa teshi akatunyumfwilewo nkumbu alimwi?

⁸ Sa lusuno lwakwe lutamaani pali ndiswe lwaitabo limwi? Sa kushomesha kwakwe kwamaninabo limwi?

⁹ Sa Lesa waluba kutufwita nkumbu? Sa wacileka kutunyumfwila nkumbu ceebo ca bukali?”

¹⁰ Lyalo ndakayeeya ayi, “Cancisa kumoyo ncakwaamba ayi, Lesa Shinkusu shoonse wacileka kutucafwa alyaansa lyakwe lyalulyo.”

¹¹ Mwaami Lesa ndaakwiingashila milimo yanu ya nkusu. Ee, ndaakwiibaluka shaankamiko shoonse nshemwakacita kalekale.

¹² Ndaakuyeeya pashintu shoonse nshemwakacita, ncakwiila ndaakuyeeya pamilimo yanu ya nkusu.

¹³ NobaLesa, nshila shanu shilisalalite. Taaku lesa wiinda ndimwe nobaLesa besu.

¹⁴ Ndimwe nobaLesa nomucita shaankamiko, mulatondesha nkusu shanu pamishobo ya mucishi.

¹⁵ Mwakafuna bantu alyaansa lyanu lya nkusu, ee, bamulunyungu lwakwe Jakobo alwakwe Josefu.

¹⁶ Maanshi ndyaakamubona nobaLesa, maanshi ayo akaloonda. Ncakwiila maanshi alaamfu akatutuma.

¹⁷ Makumbi akalosha maanshi, kwiculu kwakaba cilulumo cinene, alimwi kwakalinga kubeka koonse koonse.

¹⁸ Cilulumo canu cakanyumfwika mukapupuulwa, akubeka kwa mfula kwakatubya cishi coonse. Cishi cakatutuma akutenkaana kucitentanshi.

¹⁹ Nshila yanu yakeenda mumaanshi, mukwakwa wanu wakapula pakati ka Lweenge, nakubi kwaamba ayi momwakalyata tamukwe kuboneka.

²⁰ Mwakatanjilila bantu banu anga nditanga lya mbelele, Mwakabatanjilila kwiinda muli Mose aAloni.