Kulumbaisha 76 - Baibo Busansulushi Bwa Libuku Ili

Lesa ngushikukoma

Kumutanjilili wa bwiimbi. Kwiimba atulumbu. Lwiimbo lwakwe Asafu.

¹ Lesa ulishibikitwe mucishi ca Juda, liina lyakwe lilalemekwa muIsilaeli.

² Ŋanda yakwe ili muJelusalemu, ncakwiila ulekala paKalundu ka Siyoni.

³ Nkomunya uko wakatyoloola mifwi inyaka mulilo, mayawo alimwi amipeeni, ncakwiila ashakulwanisha nkondo shoonse.

⁴ Mwebo nobaLesa, mulicite bulemu ankusu shiinji! Mulesa abwaami bwanu kuswa kutulundu uko nkomwakakoma balwani banu.

⁵ Bashilumamba babo bakali mwakababwesela nshebakasaala, Mwakababika mutulo twa lufu. Ono nkusu alushibo lwabo lwa nkondo shakamana ncito.

⁶ Ndimwakabakalalila nobaLesa bakwe Jakobo, mwakalengesha maaki ashikoci shoonse shakafwa.

⁷ Mwebo nobaLesa mulayoosha abuumbi. Anu ngani weenga weemikana na mwebo mwakalala?

⁸ Mwakaambilisha boomboloshi bwanu kuswa kwiculu. Bamucishi ca panshi bakaloonda akuumunabo tontolo

⁹ ndimwakanyamuka ayi moomboloshe bantu. Mwakaboombolosha kwaamba ayi mufune abo batoolyatililwa mucishi.

¹⁰ Ncakwiila bukali bwanu kubabiibi bulamuletela bulemu. Abalo abo bapuluka kubukali bwanu balaakwikala muliimfwa lyanu.

¹¹ Amupe Mwaami Lesa, Lesa wanu isho nshemwakamushomesha cakulumbila. Mishobo ishingulukite ailete shipo kuwooyo weelete kuloondwa.

¹² Lakwe ulamana kulisumpula kwa bamaami, bamaami boonse ba mucishi ca panshi balamuloonda.