Kulumbaisha 74 - Baibo Busansulushi Bwa Libuku Ili

Mupailo wa mushobo uli mumapensho

Lwiimbo lwakwe Asafu lwiitwa ayi mashikili.

¹ Mwebo nobaLesa, nciinshi ncemwatufutatilila kwaciindi cilaamfu bobulya? Ino nciinshi ncemwakalalila bantu banu kwalyoonse alyoonse?

² Amwiibaluke bantu banu, abo mbomwakalisalila kalekale, mushobo uyo mwebo ngomwakafuna, kwaamba ayi ube waanu. Amwiibaluke Kalundu ka Siyoni apo mpomwakalinga kwikala.

³ Amwise mubone matongo aya. Balwani besu banyonyoola Ŋanda yanu. Ncakwiila shoonsebo muŊanda yanu.

⁴ Balwani banu bakoolobesha cakusangalala muŊanda yanu. Bakabikako mbembela yakutondesha ayi bakoma.

⁵ Bakalinga kuboneka anga mbantu bacite tweembe abo batootimboola shisamu shiinji muluundu.

⁶ Batimboola mapulanga oonse a kulubumbu. Baatimboola atweembe alimwi asheela shilemu.

⁷ Bakanyonyoola Ŋanda yanu akwiitenta. Bakabisha musena wanu usalalite umo momulambililwa.

⁸ Bakalyamboosha mumyoyo yabo ayi, “Tulaakubanyonyoola cakumaninina!” Bakatenta misena yoonse mucishi, umo Lesa mwaakalinga kulambililwa.

⁹ Shaankamiko shoonse shamana. Taaku balaluki bakacaalaawo. Taaku nabi womwi ushi nkweshi cikeele ici.

¹⁰ NobaLesa, citooba ciindi cilaamfu buyani balwani banu kabamuseka? Sa bananoocobola liina lyanu kwalyoonse?

¹¹ Nciinshi ncemwakakila kutucafwa alyaansa lyanu lyalulyo? Amufungulule lyaansa lyanu akubanyonyoola?

¹² NobaLesa, muli baami besu kuswa kalekale, ndimwe mupulusha bantu pacishi ca panshi coonse.

¹³ Ndimwe mwakapansaanya maanshi amulweenge ankusu shanu, akupwayoola mitwi ya cinyama ca mumaanshi.

¹⁴ Ndimwe mwakapwaya mitwi yakwe shinshimwe akumusowa kwaamba ayi abe cakulya ca banyama bamuluyanga.

¹⁵ Ndimwe mwakacalula tuntupu atulonga, ndimwe mwakayumya milonga inene ikunka.

¹⁶ Ndimwe mwakalenga malumwi amashiku Mwakabika lisuba amweenshi pamusena wa nshisho.

¹⁷ Ndimwe mwakabika manyinsa pacishi ca panshi, alimwi ndimwe mwakalenga meensa amupewo.

¹⁸ NoBaami baLesa amwiibaluke balwani banu mbobakamuseka, ambuli bantu baluya mbobakacobola liina lyanu.

¹⁹ Mutaabi bantu banu balefukite kubalwani babo beshilunkutwe. Bantu banu bali mumapensho mutabalubiiko kwamuyayaya.

²⁰ Kamwiibaluka cipangano canu ncemwakatupa, mukwiinga kuli beshikunyonyonganya mumisena yoonse iyubite ya mucishi.

²¹ Mutasuminishi bantu abo balyatililwa kulenshekwa nsoni. Bakandu abaabo bataaku mbobabete abalumbaishe liina lyanu.

²² NobaLesa, amunyamuke muliimikanine pamakani anu. Amuyeeye baluya mbobakamuseka cakupisha lisuba.

²³ Mutaluubi balwani banu mboboolooma cabukali. Mutaluubi kuyobela kutamaani kwa baabo bamupatite.