Kulumbaisha 72 - Baibo Busansulushi Bwa Libuku Ili

Kupailila mwaami

Lwiimbo lwakwe Solomoni.

¹ NobaLesa, amulengeshe mwaami koombolosha cabululami. Amumulengeshe koombolosha cakutanyengelela mbuli ndimwe.

² Lyalo akalele bantu banu cakutanyengelela, akweendelesha cabululami bantu banu balyatililwa.

³ Cishi ca tulundu ici aciletele bantu banu lusumpuko. Bantu bekalaamo abeende mubululami.

⁴ Mwaami wanu aakoomboloshe bakandu cakutanyengelela. Aakacafwe bataaku mbobabete, akupwayoola baabo babalyatilila.

⁵ Ndaseenga kwaamba ayi mwaami abamulunyungu lwakwe banoolelabo, kushikila lisuba amweenshi shikacileeke kupa mumuni.

⁶ Mwaami uyo aakabe anga nimfula itoolokela mumyuunda, ncakwiila anga nja tepetepe itootontosha cishi coonse!

⁷ Bululami bulaakukula kwabuumi bwakwe boonse, alwalo lusumpuko lulaakutolelela kushikila mweenshi ukacileeke kubala.

⁸ Cishi cakwe acikaswe kulweenge lomwi tibili akulweenge lumwi. Acikaswe kuMulonga wa Yufuletisi tibili akupilila lisuba!

⁹ Bantu ba muluyanga balaakufukama kunembo lyakwe, balwani bakwe balaakumumyanguta mumyeendo yakwe.

¹⁰ Bamaami bene Sipeeni aba kunsumbu abakamuletele shipo, Bamaami bene Sheba abene Seba abalo abakamuletele shipo mukumupa bulemu.

¹¹ Bamaami boonse balaakufukama kunembo lyakwe. Ncakwiila mishobo yoonse ilaakumusebensela!

¹² Ceebo ulafuna bakandu na bamulilila, abalyatililwa abo batacite shikubacafwa.

¹³ Abo balefukite abakandu ulaakubanyumfwila nkumbu, ulaakupulusha buumi bwa baabo bataaku mbobabete.

¹⁴ Ulabapulusha kuswa kubantu babalyatilila akubaabo bakali. Ncakwiila buumi bwabo mbwa makwebo abuumbi kuli nguwe.

¹⁵ Kaabukila buumi lyoonse! Golodi ya kuSheba aikapekwe nguwe. Aakapaililwe cakutacilekaawo. Aakasengelwe shoolwe lyoonsebo!

¹⁶ Amukabe shili anga ngamaila shiinji mucishi cakwe coonse. Shishango ashikanefume patulundu. Ashikacate anga nsheesho sha kuLebanoni. Mandabala anene aakasule bantu, mbweeke bwiisu mbobuswite muluundu.

¹⁷ Liina lya mwaami alikakalilile, ee, likanooliikobo bweenka mbuli lisuba. Mishobo imwi yoonse aikalilile kupekwa shoolwe kuswa kuli Lesa, mbweeke mbwaakapa mwaami uyo.

¹⁸ Aalumbaishikwe Mwaami Lesa, Lesa wa bene Isilaeli! Lakwe eenka ngwaacita shintu ishi shikankamika.

¹⁹ Alilumbaishikwe lyoonse alyoonse liina lyakwe lya bulemu. Bulemu bwakwe abumwaike akukwanabo cishi coonse. Ameni! Ameni!

²⁰ Apa mpopeela mipailo yakwe Defedi mwanaakwe Jese.