Kulumbaisha 71 - Baibo Busansulushi Bwa Libuku Ili

Mupailo wa mucembele musankwa

¹ NoBaami baLesa ndayuba muli ndimwe. Mutakandekeleshi ayi nenshekwe nsoni.

² Ceebo ca bululami bwanu amumfuune akumpulusha. Amuteye matwi anu kuli ndime akumpulusha.

³ Amube mwaandami wakuyubaako, uko nkoonjelete kucicila mushiindi shoonse, ceebo mwebo muli mwaandami wangu alilinga lyangu.

⁴ NobaLesa amumfuune kubamucita shibi. Ncakwiila kubantu babiibi beshilunkutwe.

⁵ Kulangila kwangu kuli muli ndimwe noBaami baLesa bangu Beshinkusu shoonse. Ndicinkite manungo muli ndimwe kuswabo kubwanike bwangu.

⁶ Kuswa kukushalwa kwangu ndishomete muli ndimwe. Mwakandama kwaamba ayi nshalwe kabotu. Aboobo ndaakunoomulumbaisha lyoonsebo.

⁷ Bantu baanji balakankamana pabuumi bwangu, sombi ndimwe beshikunjimikanina beshinkusu.

⁸ Mumulomo wangu muliswitebo shakumulumbaisha. Ndapisha lisuba kwaamba shabulemu bwanu.

⁹ Mutankaki bulya mbondacembela. Ee, mutamfutatili bulya mbondamana nkusu.

¹⁰ Bulya balwani bangu batooyanda kuncaya. Balabandika pantu pomwi miyeeyo mukupinga ndime.

¹¹ Balaamba ayi, “Lesa wamufutatila, amuye mumutandaanye akumucata ceebo taaku weshi amufuneeko.”

¹² NobaLesa bangu, mutabi kulaale anebo. Amufwambaane kuncafwa nobaLesa bangu.

¹³ Abo basuni kuncaya abalobelele munsoni shabo. Ee, abo basuni kuncisa abanyonyooke cakusebaana akushibulukwa.

¹⁴ Sombi nebo kulangila kwangu kunanooli muli ndimwe lyoonse. Ndanoomulumbaishabo lyoonse alyoonse.

¹⁵ Ndanooshimika shabululami bwanu alimwi alupulusho lwanu cakupisha lisuba, nabi nshishi ampolweela.

¹⁶ NobaLesa Beshinkusu shoonse ndanoolumbaisha nkusu shanu. Ndanoolumbaisha bululami bwanu, ee, bwanu nweenka.

¹⁷ NobaLesa mwakalinga kunjiisha kuswabo kubucikula bwangu. Ono abobulya ncaamba milimo yanu ikankamika.

¹⁸ Ono bulya mbondacembela, amumutwi mbomwatuba kumfwi, mutamfutatili nobaLesa kushikila nkaambilishe nkusu shanu kulishalane licisa kunembo. Ee, nkaambilishe nkusu shanu kubaabo bacisa mukushalwa.

¹⁹ Bululami bwanu nobaLesa bulashika akwiculu. Mwakacita shintu shinene abuumbi. Taaku uli mbuli ndimwe nobaLesa.

²⁰ Mwakatuma makatasho amapensho pali ndime. Sombi ndishi kwaamba ayi mulaakumbooshamo nkusu. Ncakwiila mulaakumbusha alimwi kuswa kuunshi lya nshi.

²¹ Mulaakufusha bulemu bwangu, akunkalika moyo alimwi.

²² Ndaakumulumbaisha akalumbu ceebo cakushomeka kwanu nobaLesa bangu. Ndaakunokwiimba akalumbu mukumulumbaisha ndimwe noMusalalite ba bene Isilaeli.

²³ Mulomo wangu ulaakoolobesha cakusangalala, ndaakwiimba nyimbo shakumulumbaisha. Buumi bwangu mbomwakafuna bulaakumulumbaisha cakusangalala.

²⁴ Ndaakunokwaamba shabululami bwanu cakupisha lisuba, mukwiinga abo bakalinga kusuni kuncisa, balenshekwa nsoni, akufulunganishikwa.