Kulumbaisha 7 - Baibo Busansulushi Bwa Libuku Ili

Mupailo wakusenga koombolosha kululeme

Lwiimbo lwakwe Defedi lwiitwa ayi shigaiyoni. Wakeembila Mwaami Lesa ceebo cakwe Kushi mwine Benjameni.

¹ NoBaami baLesa, baLesa bangu, muli ndimwe moonjuba. Amumfuune akumpulusha kubalwani abo batooya cimfwima,

² kwaamba ayi batankwamooni bucita nkalamu, akunsutoola mutupanshapansha kwakubula aumfuna.

^3-4 NoBaami baLesa, baLesa bangu, na kuli ngondakabishisha, na ndakacita cibiibi kumuntu utacite mulandu kuli ndime, nabi kusaala mulwani wangu kakutaaku cilubo ncaacita, nkokwaamba ayi na pasheeshi kuli ncindakacita,

⁵ anu amusuminishe balwani bangu kunkonkela akuncana. Lyalo banyonyoole buumi bwangu akungoneka mubulongo.

⁶ NoBaami baLesa, amunyamuke ono mubukali bwanu. Amubukile bukali bwa balwani bangu. Amunyamuke ono ayi muncaafwe, amoomboloshe cabululami.

⁷ Amubunganye mishobo yoonse kunembo lyanu, lyalo mubaleele kuswa kwiculu uko nkomubete.

⁸ Mwebo muloombolosha mishobo yoonse, Amuŋomboloshe kweelana akululama kwangu noBaami baLesa, ee, kweelana akubula kampenda kwangu mwebo noMwiindaawo.

⁹ NobaLesa baluleme, nomubona miyeeyo amumyoyo ya bantu. Amumanishe bubi bwa bamucita shibi akulambula baluleme.

¹⁰ Lesa Wiindaawo ndyeliyawo lyangu uyo upulusha baabo bamunyumfwila.

¹¹ Lesa ngumooboloshi ululeme, lyoonse ulapa bamucita shibi milandu.

¹² Na muntu wakaka kushiya nshila shakwe shibiibi, Lesa ulaakunona mupeeni wakwe, ulaakubamba buta bwakwe akubweeleka.

¹³ Wabamba kale shilwanisho shicaya, amifwi yakwe ya mulilo.

¹⁴ Amubone mucita shibi ulamita bubi, ncakwiila ulamita mapensho akutumbuka shakubeca.

¹⁵ Ulakaba cilindi akucilaampisha, ono ulawita mucilindi ncaakalikabila mwiine.

¹⁶ Bubi bwakwe bulamuboolela mwiine, bukali bwakwe bulamulokela pamutwi wakwe.

¹⁷ Ndalumba Lesa ceebo cakoombolosha kwakwe kululeme, ndanokwiimba liina lya Mwaami Lesa Wiindaawo mukumulumbaisha.