Kulumbaisha 68 - Baibo Busansulushi Bwa Libuku Ili

Lwiimbo lwa cishi lwakukoma

Kumutanjilili wa bwiimbi. Lwiimbo lwakwe Defedi.

¹ Ono Lesa ulanyamuka akupalanganya balwani bakwe. Boonse abo bamupatite aboondomokeko lubilo kunembo lyakwe!

² Bweenka bwiishi mbobuya amuuwo, mbweeke ubo alakwe mbweshi abasukumye. Ee, bweenka bukato mbobusunguluka kumulilo, mbweeke ubo bamucita shibi abanyonyoolwe pameenso akwe Lesa.

³ Sombi balo baluleme abasangalale. Abasangalale mubulemu bwakwe Lesa. Ncakwiila abasekelele cakusangalala abuumbi!

⁴ Amwiimbile Lesa, mwiimbe nyimbo shakulumbaisha liina lyakwe. Amwiimbishe kulumbaisha wooyo weendela pamakumbi, liina lyakwe nguMwaami Lesa, amusangalale pameenso akwe!

⁵ Ngumushali ulama bana banshiwa alimwi wiimikanina bamukalubinje. NguLesa uyo ukala mumusena wakwe usalalite.

⁶ Abo batacite bamuŋanda, Lesa ulabapa musena wakwikalaamo. Ulatanjilila bakaili kuya mulwaanguluko lwakusangalala. Sombi abo baashu balekala muluyanga.

⁷ NobaLesa ndimwakatanjilila bantu banu ndimwakeenda muluyanga,

⁸ cishi ca panshi cakatenkaana aliculu lyakalosha mfula kunembo lya Lesa wa kuSinayi, Lesa wa bene Isilaeli.

⁹ NobaLesa mwakalosha mfula iinji abuumbi. Mwakalengesha cishi canu cakalinga camana ncito kuboolelwaamo.

¹⁰ Lyalo bantu banu bakacana amusena wakwikalaamo muli ncico. Mwakapa bakandu nshebakalinga kubulite kwiinda mububotu bwanu.

¹¹ Mwaami Lesa wakapa mulawo. Ono mbaanji bakatola cikani cakwaamba ayi,

¹² “Bamaami amakoto abo a bashilumamba bacica!” Balutundu kumushi babaana shintu shakasaalwa,

¹³ nkokwaamba ayi mpolobe shinanikitwe silifa, abo bacite mapapaminwa atoobeka ceebo ca golodi wiine wiine. Ono ceebonshi mwakaliiba pakati ka shaanda sha mbelele pabushiku bwa nkondo?

¹⁴ Lesa Shinkusu shoonse ndyaakapalanganya bamaami mucishi ico, paKalundu ka Salumoni pakaba anga ncaandwa citooloka.

¹⁵ OKalundu ka Bashani, kalundu kacite bulemu. OKalundu ka Bashani, kalundu kacite nsonga shiinji!

¹⁶ Ceebonshi okalundu kacite nsonga shiinji, utoolanga camunyono kalundu ako Lesa nkaakasala ayi ekaleewo? Ee, pakalundu apo mpweshi anookala kwamuyayaya.

¹⁷ Mwaami Lesa wakashika kumusena wakwe usalalite kuswa kuSinayi. Wakesa ashikoci sha maaki sha nkondo shili shuulu ashuulu.

¹⁸ Ndimwakatanta kalundu mwakatolelela abakacatwa munkondo. Mwakatambula shipo kuswa kubantu, nabi kuswa kubaabo baashu kwaamba ayi mwebo noBaami baLesa mwikale kooko.

¹⁹ Aalumbaishikwe Mwaami Lesa mupulushi wesu. Nshiku shoonse ngoobwesa mikuli yesu ilemu.

²⁰ Lesa wesu, nguLesa upulusha, Mwaami Lesa Shinkusu shoonse ngoolengesha ayi tukonshe kuyuba lufu.

²¹ Ncakwiila Lesa ulaakupwayoola mitwi ya balwani bakwe, ee, mitwi ya baabo batolelela kubisha ulaakwiinyonyoola.

²² Mwaami Lesa wakaamba ayi, “Ndaakubaboosha kuswa kuBashani, Ndaakubaboosha kuswa panshi palweenge

²³ kwaamba ayi mukepishe shimpanta shanu mubulowa bwa balwani banu, uku kumwi bakabwa banu kabalya bulowa kweelana ambobasuni.”

²⁴ NobaLesa amubone likoto lya bantu banu lyaboneka. Ee, ndikoto lyakwe Lesa wangu alimwi Mwaami wangu litooya mumusena usalalite.

²⁵ Bali kunembo mbeshikwiimba, pesule mbeshikulisha tulumbu ashimwi. Balo bali pantu pomwi abalutundu beshikulisha misebe.

²⁶ Aalumbaishikwe Lesa mulibungano linene. Aalumbaishikwe Mwaami Lesa mulibungano lya bene Isilaeli.

²⁷ Amubone mukowa uniini wa bene Benjameni ngootoobatanjilila. Amubone kufula banaabaami, bene Juda. Kuboolaawo mbanaabaami bene Sebuluni abene Nafutali.

²⁸ NobaLesa, amwiite nkusu shanu. Amututondeshe nkusu shanu nobaLesa, bweenka mbomwakalinga kucita.

²⁹ Ceebo ca Ŋanda yanu isalalite ili kuJelusalemu, bamaami bananooleta shipo kuli ndimwe.

³⁰ Amukalalile Ijipiti, ulya munyama wamuluundu ukala mumatete. Amukalalile mishobo ili anga nditanga lya bacende aboombe. Babombye kushikila bakakuletele shipo sha silifa. Amupalanganye boonse bamusembela kulwana.

³¹ KuIjipiti kulaakuswa beshikwiimikanina beendeleshi, bamucishi cakwe Kushi balaakulibombya kuli Lesa.

³² Amwiimbile Lesa nomalelo a pacishi ca panshi. Amwiimbe nyimbo shakulumbaisha kuMwaami Lesa.

³³ Amumwiimbile uyo weendela muliculu likulukulu. Ngowooyo ululuma aliswi lyankusu.

³⁴ Amwaambilishe nkusu shicite Lesa, uyo weendelesha bene Isilaeli, alimwi ngoocite nkusu shili mwiculu.

³⁵ Lesa uyu, ee, Lesa wa bene Isilaeli ulaloondesha abuumbi ndyaaba muŋanda yakwe Isalalite. Ono ulapa nkusu abulemu kubantu bakwe. Aalumbaishikwe Lesa!