Kulumbaisha 67 - Baibo Busansulushi Bwa Libuku Ili

Lwiimbo lwakulumba butebushi

Kumutanjilili wa bwiimbi. Kwiimba atulumbu. Lwiimbo.

¹ NobaLesa amube aluse pali ndiswe akutupa coolwe. Amutulange meenso a nkumbu

² kwaamba ayi bamucishi ca panshi coonse beshibe kuyanda kwanu, ee, kwaamba ayi mishobo yoonse ishibe lupulusho lwanu.

³ Bantu boonse abamulumbaishe nobaLesa, ee, bantu boonse abamulumbaishe!

⁴ Mishobo yoonse aikondwe akwiimba ceebo cakusangalala mukwiinga muloombolosha bantu cakutanyengelela, akutanjilila mishobo yoonse ya pacishi ca panshi.

⁵ Bantu boonse abamulumbaishe nobaLesa, ee, bantu boonse abamulumbaishe!

⁶ Lesa, Lesa wesu watupa coolwe, cishi capa butebushi bubotu.

⁷ Lesa watupa coolwe, aboobo bantu boonse mucishi ca panshi abamulemeke.