Kulumbaisha 66 - Baibo Busansulushi Bwa Libuku Ili

Lwiimbo lwakulumbaisha akulumba Lesa

Kumutanjilili wa bwiimbi. Lwiimbo lwakwe Defedi.

¹ Nobantu noonse, amulumbaishe Lesa akoolobesha cakusangalala

² Amwiimbe nyimbo shisumpula liina lyakwe lya bulemu. Amumupe bulemu akumulumbaisha.

³ Amwaambile Lesa ayi, “Shintu nshemucita shilakankamika abuumbi. Nkusu shanu nshinene abuumbi cakwaamba ayi balwani banu balafukama kunembo lyanu mukuloonda.

⁴ Nsengwe yoonse ilalambila ndimwe, balamwiimbila nyimbo shakulumba. Ncakwiila baleemba nyimbo shakulumbaisha liina lyanu.”

⁵ Nobantu, kamwisa mubone Lesa ncaakacita, mubone milimo ikankamika njaacita pakati ka bantu.

⁶ Wakaalula lweenge lwaba inshi iyumu. Bamashali besu bakulukulu bakasubuka mulonga amyeendobo. Paceebo ceeco tulasangalala abuumbi muli nguwe pacikani ico.

⁷ Unanoolela lyoonse alyoonse munkusu shakwe. Meenso akwe ali pabantu ba mishobo yoonse. Anu baashu batalisumpuli kunembo lyakwe.

⁸ Amulumbaishe Lesa wesu nobantu ba mishobo yoonse. Kulumbaisha nguwe akunyumfwike.

⁹ Watulama ayi tutafwi alimwi akutufuna ayi tutakomwi.

¹⁰ NobaLesa mwakatusunka. Mwakatubotesha bweenka silifa mbooboteshekwa mumulilo.

¹¹ Mwakatuleka twawita mukoose. Mwakabika mikuli ilemu ya mapensho pamitwi yesu.

¹² Mwakaleka balwani besu kutulyatilila. Twakeenda mumulilo amumaanshi aanji. Sombi bulya mwakatuleta kumusena kutaaku shakulisukama.

¹³ Aboobo ndaakuleta milambu yakutenta kuŊanda yanu. Alimwi ndaakumupa shoonse nshendakashomesha cakulumbila.

¹⁴ Ncakwiila shoonse shakaswa mumulomo wangu ee, shoonse nshendakashomesha cakulyaambilila ndindakalinga mumapensho.

¹⁵ Ndaakubenga milambu yakutenta kuli ndimwe. Bwiishi bwa mbelele shisankwa bulaakushika kuli ndimwe. Ndaakubenga bacende ampongo.

¹⁶ Kamwisa mukutike noonse nomulemeka Lesa, ntoomulwiita nshaakancitila.

¹⁷ Ndakamulilila ayi ancaafwe, ndakamwiimbila nyimbo shakulumbaisha.

¹⁸ Nindalinga kucikondwa shibiibi mumoyo wangu, naakwiinga Mwaami Lesa taakwe kunyumfwa mupailo wangu.

¹⁹ Ono Lesa ndushinisho wankutika, akunyumfwa mupailo wangu.

²⁰ Aalumbaishikwe Lesa mukwiinga taakwe kukaka mupailo wangu nabi kukusha lusuno lwakwe lutamaani pali ndime!