Kulumbaisha 65 - Baibo Busansulushi Bwa Libuku Ili

Lwiimbo lwakulumbaisha akulumba

Kumutanjilili wa bwiimbi. Lwiimbo lwakwe Defedi.

¹ NobaLesa, cililuleme kumulumbaisha muSiyoni, akucita kweelana ambotwakashomesha kuli ndimwe.

² Mwebo ndimwe mukumbula mipailo. Aboobo boonse balaakwisa kuli ndimwe.

³ Shibiibi shesu ndishitukoma mwebo mulashilekelela.

⁴ Balicite coolwe abo mbomwakasala, abo mbomwakaleta ayi bekale mumusena wanu usalalite. Tulaakukuta kushintu shibotu sha muŋanda yanu, ncakwiila shoolwe shamuŊanda yanu isalalite.

⁵ Mwebo mulatukumbula kwiinda mukucita shaankamiko sha bululami, nobaLesa bapulushi besu. Kulangila kwa bantu boonse ba mucishi ca panshi, akwa baabo bali kwitala lya lweenge, kuli muli ndimwe.

⁶ Mwebo mwakabonesha nkusu shanu pakulenga tulundu, Ncakwiila mulicite nkusu shiindaawo.

⁷ Muloomusha ciwuutishi ca lweenge alimwi acoongo ca maaba. Ee, muloomusha kulila kwa bantu ba mishobo yoonse.

⁸ Abo bekala kweela cishi ca panshi balaloonda shaankamiko nshemwakacita. Milimo yanu ilabapa kukondwa Kuswa kulubasu lumwi lwa cishi kuya mukushika akulumwi.

⁹ Mulalama cishi kwiinda mukucipa mfula, mulacipa mboleshi shiinji abuumbi. Tulonga twanu mulatususha maanshi kwaamba ayi bantu babe ashilyo. Mboboobo mbomwakacibamba ayi cibe.

¹⁰ Mulalosha mfula iinji mumyuunda, alimwi mulaibombesha amaanshi, Mulabombya bulongo amfula yatepetepe akulengesha shishango kumena.

¹¹ Pakumana mwaaka kulatebulwa shakulya shiinji. Ncakwiila matala alasula abuumbi kushakulya.

¹² Mumafulo muliswitebo shifubwa. Lyalo munshaatulundu mulaba kusangalala.

¹³ Luundu loonse luliswitebo mbelele, amwalo mushinyika mwasulabo witi. Shoonse ishi shitokoolobesha akwiimba cakusangalala.