Kulumbaisha 64 - Baibo Busansulushi Bwa Libuku Ili

Mupailo wakusenga kutabililwa

Kumutanjilili wa bwiimbi. Lwiimbo lwakwe Defedi.

¹ Amukutike liswi lyangu nobaLesa, nebo ndi mumapensho. Amumfuune kubalwani bangu abo batoonengesha boowa.

² Amunshiise kubamucita shibi abo bampinga, ee, kuswa kubaabo bacita bubi beshikunooyobekabo.

³ Bantu abo balanona milaka yabo anga njimipeeni, balaŋambila maswi ayasa anga njimifwi

⁴ Balayubilila akuwaala mifwi bantu batacite mulandu. Baleewaala kuli mbabo cakufwambaana alimwi cakubulaawo njeyeela caamba.

⁵ Balayuminishanya mumiyeeyo ibiibi. Balabandikabo bwakushisa toose twabo akwaamba ayi, “Anu ngani weshi akatuboone?”

⁶ Balapinga kucita miyeeyo italuleme. Balaamba ayi, “Twapanga muyeeyo ubotu abuumbi!” Ncakwiila miyeeyo amyoyo ya bantu ilishupite.

⁷ Ono Lesa ulaakubayasa mifwi yakwe. Balaakucisikwa paciindi ncebateengashite.

⁸ Ulaakubanyonyoola ceebo ca maswi abo abiibi. Abo beshi bakababoone balaakunoopukumunabo mitwi.

⁹ Lyalo bantu boonse balaakuloonda. Shintu isho Lesa nsheshi akacite balaakunooshiyeeya alimwi balaakunooshimikilako bamwi.

¹⁰ Anu baluleme abasangalale muMwaami Lesa akuyuba muli nguwe! Abamulumbaishe abo batacite tumpenda munyoyo yabo!