Kulumbaisha 62 - Baibo Busansulushi Bwa Libuku Ili

Lushomo mukufuna kwakwe Lesa

Kumutanjilili wa bwiimbi. Lwiimbo lwakwe Defedi lwakalembelwa Jedutuni.

¹ Moyo wangu ulababo tontolo kulangila kuli Lesa, mukwiinga kuli nguwe eenka nkokuswa lupulusho lwangu.

² Lakwe eenka ngomwaandami wangu alimwi ndolupulusho lwangu. Teshi nkatenkanishikweewo ceebo lakwe ndilinga lyangu.

³ Ino nciindi cilaamfu buyani kamuuma muntu cakumucisa? Ee, muntu uyo uli anga ndubumbu lucite myaansha nabi lushito lutootenkaana.

⁴ Ncemupingitebo nkumukusha mubulemu bwakwe. Mulasangalala abuumbi mumakani abubeshi. Mulapa coolwe amilomo yanu, sombi mumyoyo yanu kamushingana.

⁵ Omoyo wangu umunabo tontolo mukushoma kuli Lesa, mukwiinga kuli nguwe eenka nkokuswa lulangilo lwangu.

⁶ Lakwe eenka ngomwaandami wangu alimwi ndolupulusho lwangu. Teshi nkatenkanishikweewo ceebo lakwe ndilinga lyangu.

⁷ Lupulusho lwangu abulemu shilaswa kuli Lesa, Ngomwaandami uyumu nta alimwi nceciyubilo cangu

⁸ Mwebo nobantu amucinke manungo muli nguwe ciindi coonse, Amumulwiite mapensho anu oonse, ceebo Lesa eenka nceciyubilo cesu.

⁹ Bakandu mboobubo anga ngumuuwo, abalo babile balibo anga ngumuuya wayoyekwa linkanda lyomwi. Na babikwa pacipimo taaku mbobalema, boonse pantu pomwi balyuubitebo anga ngumuuya wayoyekwa linkanda lyomwi.

¹⁰ Mutanooyeeya ayi kukonga kulacafwa, nabi kulisumpwita mushintu shakwiipa. Nabi bubile bwanu bwafula mutaciinki manungo muli mbubo.

¹¹ NobaLesa mwakaambabo linkanda lyomwi, sombi nebo ndabwesaawo shintu shobilo. Comwi ncakwaamba ayi nobaLesa muli beshinkusu.

¹² Cimwi ncakwaamba ayi noBaami baLesa mulicite lusuno. Ncakwiila mulaakulambula muntu womwi awomwi kweelana asheesho nshaakacita.