Kulumbaisha 60 - Baibo Busansulushi Bwa Libuku Ili

Mupailo wakusenga kufunwa

Kumutanjilili wa bwiimbi. Mumukumo wa “Maluba a Cipangano.” Lwiimbo lwakwe Defedi lwakwiisha, lwiitwa ayi mikitamu, paciindi ndyaakalwana Alamu Naalaimu aAlamu Soba alimwi apaciindi Joabu ndyaakaboola akucaya bene Edomu bali 12,000 mucinyika ca Mwiinyo.

¹ NobaLesa ncakwiila mwebo mwatukaka, mwatunyonyweeta shitufuna. Ee, mwatufutatikila moyo. Ono amutubooshe kumubili alimwi.

² Mwatenkaanya inshi kucitentanshi, akwiipasoola. Ono amuyeelanye alimwi mukwiinga ilatenkaana ciyoosha.

³ Bantu banu mwabalengesha kwiinda muciindi ciyumu. Tutooya citalantantabo anga twakolwa waini.

⁴ Nakubi boobo abo bamulemeka mwabeemikila mbembela, kwaamba ayi bacicile nkuko kuloonda nkondo ya mata.

⁵ Amutulengeshe kukoma kwiinda munkusu shanu, amukumbule mipailo yesu. Ee, kwaamba ayi bantu abo mbomusuni, bafunwe.

⁶ Ono Lesa waamba kuswa kuŋanda yakwe isalalite ayi, “Cakukoma ndaakubaanya ndabala ya Shekemu, acalo cinyika ca Sakoti ndaakucibaanya bantu bangu.

⁷ Gilyadi ngwaangu alakwe Manase ngwaangu. Efuleemu ncecimpoompo cangu. Juda njenkoli yangu ya bwaami.

⁸ Moabu njembale yangu yakusambilaamo, alimwi nkwabilo shangu ndaakushiwaala pali Edomu, akoolobesha cakukoma pabene Filisiti.”

⁹ Anu ngani eshi aye anshishe kundabala icite lubumbu luyumu? Ngani eshi antanjilile kuya KuEdomu?

¹⁰ Taaku abamwi sobwe, ndimwe nweenka nomwatukaka, ee, mwebo nweenka nobaLesa nomwacileka kuya abashilumamba besu kunkondo.

¹¹ Amutucaafwe ono kulwana balwani besu, mukwiinga lucafwo luswa kubantu taaku mbolubete!

¹² Na mwebo nobaLesa kamuli andiswe tulaakukoma. Ncakwiila ndimwe mweshi mukatukomeneeko balwani.