Kulumbaisha 59 - Baibo Busansulushi Bwa Libuku Ili

Kusenga kulamwa

Kumutanjilili wa bwiimbi. Mumukumo wa “Utanyonyooli.” Lwiimbo lwakwe Defedi lwiitwa ayi mikitamu paciindi Saulo ndyaakatuma bantu kulindilila kuŋanda yakwe kwaamba ayi bamucaaye.

¹ NobaLesa bangu, amumfuune kuswa kubalwani bangu. Amuntabilile kubantu aba bambukila akundwana.

² Amumfuune kubamucita shibi aba. Amumpulushe kubantu bacayi abo.

³ Amubone batoolindilila kuncaya. Basankwa babiibi myoyo balibungabunga mukupinga ndime. Nakubi boobo taaku cibiibi nabi mulandu ngondakacita, noBaami baLesa.

⁴ Kutaaku acilubo ncendakacita batoopilingana akunoolumbila kulwana. Amunyamuke ono, mwise muncaafwe akulibonena citoocitika!

⁵ NoBaami baLesa Beshinkusu shoonse, baLesa ba bene Isilaeli. Amunyamuke mupe mulandu bakunsengwe boonse. Mutalekeli nabi womwi pabaabo baashu bapinga kuncaya pataapu aceebo.

⁶ Balesa macolesha kabesa cibuluma anga mbakabwa, kabaya ceendeenda mundabala inene.

⁷ Amunyumfwe shitooswa mumilomo yabo, Ncakwiila balaamba maswi ayasa anga njimipeeni. Beene balalibeca ayi, “Taaku weenga watunyumfwa.”

⁸ Sombi mwebo noBaami baLesa mulabaseka, alimwi mulasebaanya mishobo ya bakunsengwe.

⁹ Mwebo nomumpa nkusu, meenso angu ali pali ndimwe, mukwiinga muli ndimwe moonjuba nobaLesa.

¹⁰ Lesa ulinsuni, aboobo ulaakuntanjilila. Ulaakulengesha meenso angu kubona balwani bangu kabakometwe.

¹¹ Mutabacaayi noBaami baLesa, noliyawo lyesu, mukwiinga inga bantu bangu baluba kukoma kwanu. Sombi mubapalanganye banooya ciingailabo koonse koonse ayi bawe!

¹² Abacatwe mukulisumpula kwabo ceebo ca shibiibi shiswa mumilomo yabo, ee, maswi abiibi ayo ngobeshi kwaamba. Ceebo ca mashingo ngobaamba akubeca kwabo

¹³ amubanyonyoole mubukali bwanu. Mubanyonyoole kushikila balobelele. Lyalo bantu balaakwishiba ayi Lesa ngoolela pabamulunyungu lwakwe Jakobo pantu pomwi amishobo imwi yoonse ya pacishi ca panshi.

¹⁴ Balwani bangu balesa macolesha kabesa cibuluma anga mbakabwa, kabaya ceendeenda mundabala inene.

¹⁵ Baleengaila kuyandoola cakulya. Na babula kukuta balalila.

¹⁶ Sombi nebo ndanokwiimba nkusu shanu. Kulila bwaca ndanokwiimba shalusuno lwanu lutamaani, mukwiinga mwebo kuli ndime muli lilinga lya mabwe, kuli ndime muli ciyubilo muciindi ca mapensho.

¹⁷ Ndanoomulumbaisha mwebo nonkusu shangu, mukwiinga mwebo nobaLesa muli lilinga lyangu lya mabwe. Ee, muli baLesa abo bambonesha lusuno lutamaani.