Kulumbaisha 58 - Baibo Busansulushi Bwa Libuku Ili

Mupailo wakusenga Lesa ayi ape mulandu bamucita shibi

Kumutanjilili wa bwiimbi. Mumukumo wa “Utanyonyooli.” Lwiimbo lwakwe Defedi lwiitwa ayi mikitamu.

¹ Nobaleli, sa bupingushi bwanu buliluleme? Sa koombolosha kwanu kuliluleme pakati ka bantu?

² Sobwe. Mumyoyo yanu mulayeeyabo bubi mbomukonsha kucita, alimwi mulaleta shimfulunganya mucishi.

³ Anu bamucita shibi balalubabo kabacimititwe. Mbeshikubishabo akubeca kuswa kukushalwa kwabo.

⁴ Balicite buyoka anga mbwa nsoka iine. Ee, anga mbwakwe fumbe uyo ushinkite matwi.

⁵ Taanyumfwi liswi lya muntu shimampelampela nabi lya muntu ucenjete shibwaanga.

⁶ NoBaami baLesa amutyoloole meeno mumilomo yabo. Nkalamu sha bantu ishi amushisokoole meeno.

⁷ Abashiminganebo anga ngamaanshi ainda kaaya mumulonga. Abakalyatoolwe akunyoŋwaatika anga mbwiisu bwalyatoolwa.

⁸ Ababebo anga ninkumbakumba iya cisunguluka pakweenda, nabi anga nkafunga kashalwa, sombi cakutabonawo lisuba.

⁹ Lesa aabalobye cakufwambaana bweenka bushimika mulilo wa mabuba, Walo ulashimikabo nabi shiliiwo tashina kubila.

¹⁰ Baluleme balaakusangalala na bakabone bamucita shibi kababooshelwa cishole. Balaakukondwa kukubula mubulowa bwa bamucita shibi amyeendo yabo.

¹¹ Lyalo bantu balaakwaamba ayi, “Anu ncakwiila nkocili cilambu ca baluleme. Ndushinisho nkwaali Lesa woombolosha nsengwe yoonse.”