Kulumbaisha 57 - Baibo Busansulushi Bwa Libuku Ili

Mupailo wakusenga lucafwo

Kumutanjilili wa bwiimbi. Mumukumo wa “Utanyonyooli.” Lwiimbo lwakwe Defedi lwiitwa ayi mikitamu paciindi ndyaakaloboka kuswa kuli Saulo kuya kucimfwengo.

¹ Amunyumfwile nkumbu nobaLesa, amunyumfwile nkumbu, mukwiinga muli ndimwe moonshisa buumi bwangu. Ndanooyubite mushimfule sha mapapaminwa anu, kushikila ciindi cakunyonyoolwa ici cikeende.

² Ndapaila kuli Lesa Shinkusu shoonse, ee, kuli Lesa uyo ucita kweelana akuyanda kwakwe pali ndime.

³ Ulakumbula kusenga kwangu kuswa kwiculu akumpulusha. Abo bantandaanya ulabakalalila. Munshila iyo ulantondesha lusuno lwakwe lutamaani, ulantondesha akushomeka kwakwe.

⁴ Ndishingulukitwe abalwani abo bakali anga ninkalamu shiluma bantu. Meeno abo ali anga ngamasumo amifwi ayalo milaka yabo ilayasabo anga njimipeeni ikolete.

⁵ NobaLesa amutondeshe nkusu shanu mwiculu, bulemu bwanu abuboneke pacishi ca panshi coonse!

⁶ Balwani bangu bakanteya bukonde ayi bancaate, Buumba bweendilila nebo ndatentuka. Bakakaba cilindi munshila yangu ayi nkawiteemo, sombi bakawitaamo beene.

⁷ Ono moyo wangu ulicite lushomo nobaLesa. Ncakwiila nshintootenkaana napaceyi. Ndaakunoomwiimbila akumulumbaisha.

⁸ Ono omoyo wangu libambe! Okalumbu kangu libambe! Ceebo ndyeelete kucesha bushiku.

⁹ NoBaami baLesa ndaakumulumbaisha pakati ka mishobo. Ndaakwiimba nyimbo shakulumbaisha ndimwe pakati ka bantu.

¹⁰ Mukwiinga lusuno lwanu lutamaani ndunene cakushika akwiculu, akwalo kushomeka kwanu cakushika akumakumbi.

¹¹ NobaLesa amutondeshe nkusu shanu mwiculu, bulemu bwanu abuboneke pacishi ca panshi coonse!