Kulumbaisha 56 - Baibo Busansulushi Bwa Libuku Ili

Mupailo wakucinka manungo muli Lesa

Kumutanjilili wa bwiimbi. Mumukumo wa “Mpolobe pamibanga yakulaale.” Lwiimbo lwakwe Defedi lwiitwa ayi mikitamu paciindi bene Filisiti ndibakamucata kuGati.

¹ NobaLesa amunyumfwile nkumbu ceebo balwani bangu batooya cintandaanya. Lilaya mukwipila balampensha.

² Beshikuncaya liina balantandaanya lilaya mukwipila. Mbaanji batoondwana kwiinda mukulisumpula kwabo.

³ Na ndanyumfwa boowa, ndanoocinka manungo muli ndimwe.

⁴ Ee, ndanooshoma muli Lesa uyo mwine maswi ngoonumbaisha. Ndicinkite manungo muli Lesa, aboobo teshi nkaloonde. Anu muntu ufwa inga wacitanshi kuli ndime?

⁵ Balwani bangu balapisha lisuba kabapilinganya bukoonko bwangu. Balo cili kumoyo lyoonse nkupinga kuncisa.

⁶ Balabungana akunjubilila. Balalangilisha nyendelo shangu. Ncakwiila balafwima buumi bwangu.

⁷ NobaLesa amubape mulandu pabubi bwabo, mubukali bwanu amunyonyoole mishobo iyi.

⁸ Matongooshi angu amwaalembe, Amulembe shaminsonshi yangu mulibuku lyanu. Sa te shoonse shililembetwe mulibuku lyanu?

⁹ Lyalo balwani bangu balaakupilukaamo kuboowa, bushiku ndaakupaila kuli ndimwe. Ncendabilite ncakwaamba ayi Lesa uli kulubasu lwangu.

¹⁰ Ee, Mwaami Lesa mwine maswi ngoonumbaisha.

¹¹ Ndicinkite manungo muli Lesa cakubula boowa. Anu muntu ufwa inga wacitanshi kuli ndime.

¹² NobaLesa, ndaakumupa shoonse nshendakashomesha cakulumbila. Ndaakubenga milambu yangu yakulumba kuli ndimwe.

¹³ Mukwiinga mwebo mwakapulusha buumi bwangu kuswa kulufu, akuntabilila kwaamba ayi ntakomwi kubalwani. Aboobo ndeenda muliimfwa lyakwe Lesa, mumuni uyo umunikila boomi.