Kulumbaisha 55 - Baibo Busansulushi Bwa Libuku Ili

Mupailo wa muntu waabwa mumaansa a balwani kumubye

Kumutanjilili wa bwiimbi. Kwiimba a tulumbu. Lwiimbo lwakwe Defedi lwiitwa ayi mashikili.

¹ NobaLesa amunyumfwe mupailo wangu, mutabiki minsuula kukusenga kwangu.

² Amunkutike akunkumbula. Kulisukama kwantyoloola abuumbi.

³ Shitokwaamba balwani bangu pali ndime shanenga boowa. Ndatentuka kukulyatililwa kubamucita shibi. Ncakwiila balandetela mapensho anene. Batookalala pali ndime cakutaboolawo pesule.

⁴ Moyo wangu wapenga abuumbi, kuloonda lufu kwansakata.

⁵ Boowa akututuma shili pali ndime. Ncakwiila ndatentuka abuumbi kuboowa.

⁶ Nindalinga kucite mapapaminwa anga nimpolobe, naakwiinga ndoolukila kwakupumunina.

⁷ Ee, inga ndoolukila kulaale, akuyaka ŋanda yangu muluyanga.

⁸ Alimwi inga ndacabaana kulangoola mwakuyuba, kuyuba cipuupu ciyoosha alimwi mfuula ya mapensho.

⁹ NoBaami baLesa, amufulunganye miyeeyo njebatoopanga pantu pomwi abukoonko bwa bamucita shibi abo. Mukwiinga ndaboona nkondo ashimfulunganya mundabala inene.

¹⁰ Malumwi amashiku balashinguluka lubumbu lwa ndabala. Bulubishi amakatasho nsheshasulaamo.

¹¹ Bunyonyooshi bulibo poonse poonse, mumishika amumikwakwa mulibo kunyonyongana akubeca.

¹² Nicalinga cakwaamba ayi mbalwani batoontukana, naakwiinga ndaliyuminisha. Naalinga muntu umpatite wambukila, naakwiinga ndamuyuba.

¹³ Sombi ndiwe oshibinda wangu, ncakwiila mweensuma mwiine mwiine.

¹⁴ Webo twakalinga kunyumfwana abuumbi. MuŊanda yakwe Lesa twakalinga kuya soonse.

¹⁵ Balwani bangu abafwe ciindi cabo kacitana kushikila. Abaye kumusena wa bafu kabalasha mukwiinga bubi bwayaka maanda pakati kabo.

¹⁶ Sombi nebo ndapailabo kuMwaami Lesa, ncakwiila alakwe ulampulusha.

¹⁷ Macolesha, macuunsa amalumwi eene, ndoolobesha kuli nguwe mubuumba bwangu, alakwe ulanyumfwa liswi lyangu.

¹⁸ Ulampulusha kuswa munkondo njeendwana kwakubulaawo acimenga, nakubi kwaamba ayi mbaanji bampinga.

¹⁹ Ncakwiila Lesa uyo ucite cuuna ca bwaami kuswabo kukalekale, ulaakunyumfwa kusenga kwangu akubakoma. Ee, ceebo balakaka kushiya nshila shabo alimwi Lesa tabamulemeki.

²⁰ Mweensuma wakabukila babye. Wakapwaya cipangano cakwe.

²¹ Maswi akwe akalinga kukondelesha kwiinda bwaanda, sombi moyo wakalinga kushimbite kulupato. Maswi akwe akalinga kubombya anga ngamafuta a olifi, sombi alayasa anga njimipeeni ikolete abuumbi.

²² Amutule nshemulisukama mumaansa a Mwaami Lesa. Lakwe ulaakulama buumi bwanu kabotu. Taaku muntu ululeme ngweshi akaleeke ayi akomwe.

²³ Sombi bantu abo basunishi kutila bulowa akubeca, mwebo nobaLesa mulaakubawaala mumusena wa bafu. Teshi bakamaane amusa wa nshiku shabo. Nakubi boobo nebo ndanoocinkite manungo muli ndimwe.