Kulumbaisha 54 - Baibo Busansulushi Bwa Libuku Ili

Mupailo wakusenga lucafwo ayi akome balwani

Kumutanjilili wa bwiimbi. Kwiimba atulumbu. Lwiimbo lwakwe Defedi lwiitwa ayi mashikili paciindi bene Sifi ndibakaya kuli Saulo akumwaambila ayi, “Defedi uliyubite pakati kesu.”

¹ NobaLesa amumpulushe kwiinda muliina lyanu. Amutondeshe kubula mulandu kwangu kwiinda munkusu shanu.

² NobaLesa amunyumfwe mupailo wangu. Amukutike maswi atooswa mumulomo wangu.

³ Baswamashi bayoosha batoosa mukundwana, bantu batashinshikili batoofwima buumi bwangu, ncakwiila bantu abo batabiki maano kuli Lesa.

⁴ Sombi Lesa ncakwiila ngooncafwa. Mwaami Lesa ngoolama buumi bwangu.

⁵ NobaLesa bubi abuboolele baabo batooncaya liina. Amubanyonyoole kwiinda mukushomeka kwanu.

⁶ Lyalo ndaakubenga mulambu wakulyaaba kuli ndimwe. Ndaakulumbaisha liina lyanu mukwiinga muli babotu.

⁷ Ee, ceebo mwampulusha kuswa kumapensho angu oonse, alimwi ceebo meenso angu abona kukomwa kwa balwani bangu.