Kulumbaisha 52 - Baibo Busansulushi Bwa Libuku Ili

Koombolosha kwakwe Lesa aluse lwakwe

Kumutanjilili wa bwiimbi. Lwiimbo lwakwe Defedi lwiitwa ayi Mashikili, paciindi Dowegi mwine Edomu ndyaakaya kuli Saulo akumwaambila ayi, “Defedi uli kuŋanda yakwe Aimeleki.”

¹ Omubile webo, ceebonshi ulalisumpwita pabubi? Kushomeka kwakwe Lesa nkwalyoonse alyoonse.

² Lilaya mukwipila ncito webo nkunooyeeyabo shakunyonyoola bamwi. Mulaka wako ulikolete anga nkalesala, ee, ceebo cakubeca lyoonse.

³ Mulakondwa kubisha kwiinda kucita shibotu, alimwi akubeca kwiinda kwaamba shalushinisho.

⁴ Webo omanempula, ulakondwa kucisa bantu. Ulakondwa kubacisa kwiinda mumaswi ako abubeshi!

⁵ Paceebo ceeco, Lesa ulaakunyonyweetabo limwi. Ulaakukucata akukukusha muŋanda yako. Ncakwiila ulaakukunonkolaamo mucishi ca boomi.

⁶ Bantu bacita shiluleme baakubona ayi ici cacitika, balaakuloonda. Mpeeke balaakutalika kuseka akwaamba ayi,

⁷ “Amubone anooyu ono musankwa ulya utakwe kuyubila muli Lesa. Sombi lakwe wakacinka manungo mububoni bwakwe buunji, akulipa nkusu kwiinda mukunyonyoola bamwi!”

⁸ Sombi nebo ndibo anga ncisamu ca maolifi cishangitwe muŋanda yakwe Lesa. Ndicinkite manungo mulusuno lutamaani lwakwe Lesa kwalyoonse alyoonse.

⁹ Ndaakunoomulumba lyoonse pashintu nshemwakacita. Ndaakusumpula liina lyanu libotu pakati ka bantu banu.