Kulumbaisha 51 - Baibo Busansulushi Bwa Libuku Ili

Mupailo wakusenga kulekelelwa

Kumutanjilili wa bwiimbi. Lwiimbo lwakwe Defedi, Natani mulaluki ndyaakesa kuli nguwe pamakani akwe Batisheba.

¹ NobaLesa amunyumfwile nkumbu kweelana alusuno lwanu lutamaani. Ee, kweelana ankuumbu shanu shiinji amushiminganye milandu yangu yoonse.

² Amunsaanshe kulubisha kwangu koonse, akunsalasha kuswa kushibiibi shangu.

³ Shilubo shangu shoonse ndishishi, ncakwiila kubisha kwangu ndakwiibaluka.

⁴ Ndakabishisha ndimwe, ee, mwebo nweenka, ndakacita cintu cibiibi pameenso anu. Ndushinisho mulalulika kuŋamba ayi ndilubite, alimwi tamukwe kulubya kumpa mulandu.

⁵ Nebo ndakalinga mucita shibi kuswabo kukushalwa, ncakwiila mucita shibi kuswabo bushiku bama mbobakamita.

⁶ Ndushinisho mwebo mulisuni muntu ushomeka, paceebo ceeco amunjiishe kuba musongo lyoonse.

⁷ Amunkushe shibiibi kwaamba ayi mbe usalalite, ee, amunsaanshe lyalo ntootuba kwiinda mapepe a nkobokobo.

⁸ Amunsuminishe nyumfwe ciyobeyobe cakusangalala akukondwa. Amusuminishe mubili wangu uyo ngomwapwayoola kubuumba kusangalala cipya.

⁹ Amufutatile shibiibi shangu akushiminganya bubi bwangu boonse.

¹⁰ NobaLesa, amulenge moyo usalalite muli ndime. Mubike moyo upya ushomeka muli ndime.

¹¹ Mutantandaanyi kuswa kumeenso anu, nabi kunyaya Mushimu wanu Usalashi.

¹² Amumboosheshe kusangalala kwa lupulusho lwanu, akunengesha kuyanda kunoonyumfwila ndimwe.

¹³ Lyalo ndaakwiisha milawo yanu kubamucita shibi, ncakwiila abalo balaakusandukila kuli ndimwe.

¹⁴ NobaLesa mutandeeki ayi mfwe, sombi amumpulushe. Lyalo ndaakushimikila pabululami bwanu cakukondwa.

¹⁵ NoBaami baLesa, amuncaafwe ayi ŋambe, lyalo mulomo wangu ulaakumulumbaisha.

¹⁶ Teshi milambu imusangalasha mwebo, niyalinga kumusangalasha naakwiinga ndeebenga. Ncakwiila milambu yakutenta teemusangalashi.

¹⁷ Sombi mulambu umusangalasha nobaLesa, nkuba amoyo wakulibombya. Mwebo tamukaki moyo wakulibombya, wasanduka kuswa kushibiibi.

¹⁸ NobaLesa, amucite shibotu kuli Siyoni ceebo ca nkumbu shanu. Amuyake cipya lubumbu lwa Jelusalemu.

¹⁹ Lyalo milambu yeelete ilaakumusangalasha. Ee, milambu yesu yakutenta ilaakumusangalasha alimwi bacende balaakubengwa pacipaililo canu.