Kulumbaisha 50 - Baibo Busansulushi Bwa Libuku Ili

Kulambila kwalushinisho

Lwiimbo lwakwe Asafu.

¹ Lesa Shinkusu shoonse, Mwaami Lesa utokwiita cishi coonse. Utokwiita bantu kuswa kooko lisuba nkoliswita kuya mukushika ankolipilila.

² Bulemu bwakwe Lesa bulabala kuswa muSiyoni, ndabala inene iyo ibotu cakushika peela kubota.

³ Lesa wesu utoosa, sombi kuteshi buumwite. Mulilo ubilima, ukali, ulibo muliimfwa lyakwe. Acalo cipuupu ciyoosha cilimushingulukite.

⁴ Uleeta liculu acishi ca panshi kuba bakamboni pakoombolosha bantu bakwe.

⁵ Ulamba ayi, “Amubunganye bantu bangu bashomeka kunembo lyangu, ee, bantu abo bakapanga cipangano anebo kwiinda mukubenga mulambu.”

⁶ Liculu lyomwi alyomwi lilatondesha patuba kwaamba ayi, Lesa uliluleme. Lilatondesha alimwi ayi mwiine Lesa ngowoombolosha bantu bakwe.

⁷ “Amukutike nobantu bangu ŋambe. Nobene Isilaeli, ntoomushinina. Nebo ndime Lesa, Lesa wanu.

⁸ Nshintoomukalalila ceebo ca milambu imwi, nabi milambu yakutenta iyo njemubenga lyoonse kunembo lyangu.

⁹ Nakubi boobo nshisuni bacende baswa kushimpati shanu, nabi bapeepe kuswa mumatanga anu.

¹⁰ Ceebo banyama boonse bamuluundu mbaangu, aŋombe shoonse shitooya cilya mushuulu ashuulu sha tulundu, nshaangu.

¹¹ Bayuni boonse bamuluundu mbaangu, shintu shoonse shiyoya shili mumo nshaangu.

¹² “Niyalinga nsala yankola, naakwiinga nshisengi ndimwe cakulya mukwiinga cishi ashintu shoonse shili mumo nshaangu.

¹³ Sa nebo ndalya nyama ya bacende na kunwa bulowa bwa bapeepe?

¹⁴ Amubenge milambu yakulumba kuli Lesa. Amupe shoonse nshemwakashomesha cakulumbila kuli Lesa wa kwiculu Wiindaawo.

¹⁵ Lyalo mwaakunjita muciindi ca mapensho ndaakumupulusha, aboobo mulaakunumbaisha.”

¹⁶ Sombi kubamucita shibi Lesa ulaamba ayi, “Mulicite nkusunshi shakusungila milawo yangu mumutwi akuyaamba, nabi kunookwaamba shacipangano cangu?

¹⁷ Mwebo tamusuni kufundwa kuswa kuli ndime alimwi mulafutatila maswi angu.

¹⁸ Mulacita na mwacana mwiipi nkweendelanaakwe. Shibusa shanu mbeshibulale.

¹⁹ Mulasebensesha milomo yanu kububi, ayalo milaka yanu njeyeelula makani abubeshi.

²⁰ Mwebo mulisuminite kukalila mukwabanu ayi mumufuuye. Taaku mbocibete kuli ndimwe kucaya liina lya mukwabanu swa nswe.

²¹ Ishi shintu ndalinga kunoomweebelabo kamushicita. Mwebo mwalinga kuyeeya ayi ndi anga ndimwe. Ono sunu ntoomukalalila akutula mulandu wanu patuba kunembo lyanu.

²² “Amukutike ono mwebo nomumbikila minsuula, kwaamba ayi ntamunyonyooli, lyalo taaku eshi akamufune!

²³ Mulambu upa bulemu kuli ndime nkunumba, ndushinisho anebo ndaakupulusha muntu uli woonse unyumfwila!”