Kulumbaisha 5 - Baibo Busansulushi Bwa Libuku Ili

Mupailo wakulifuna

Kumutanjilili wa bwiimbi. Kwiimba amitoolilo. Lwiimbo lwakwe Defedi.

¹ NoBaami baLesa, amuteye matwi kumaswi angu, amunyumfwe kutongela kwangu.

² Amunyumfwe kulila kwangu nobaLesa bangu, noBaami bangu, mukwiinga ndapaila kuli ndimwe.

³ Macuunsa mulanyumfwa liswi lyangu, pakuswa lisuba ndapaila kuli ndimwe akulindilila ayi munkumbule.

⁴ Mwebo muli baLesa batasuni bubi, ee, bamucita shibi tabakoonshi kwikala amwebo.

⁵ Balisumpula tabakoonshi kwiimikana pameenso anu, mukwiinga mwebo mulipatite bamucita shibi boonse.

⁶ Mulanyonyoola bantu beshikubeca. Mulacimwa bantu batila bulowa alimwi abeshikwiinda bamwi kumaano.

⁷ Sombi mulusuno lwanu lunene ndakonsha kwinjila muŊanda yanu, ndakonsha kulambila muŊanda yanu Isalalite, akukotamina ndimwe mukumulemeka.

⁸ Balwani bangu mbaanji noBaami baLesa. Amuntanjilile mukucita kuyanda kwanu, mundulikile nshila yanu, noomukonkela.

⁹ Isho shaamba balwani bangu tashishomwa, mukwiinga balisunibo kunyonyoola. Maswi abo ngabotu alimwi ngabushicibusa, sombi muli kweena kwabucayi.

¹⁰ Ncakwiila amubape mulandu nobaLesa. Shintu nshebapinga kucita ashibanyonyoole. Amubataande kuswa pemeenso anu ceebo ca shibiibi shabo shiinji, alimwi aceebo cakwaashukila ndimwe.

¹¹ Sombi abo boonse beshi bayube muli ndimwe, basangalale, alimwi lyoonse banokwiimba ceebo cakusangalala. Kamufuna baabo bamusuni. Ceebo ca ndimwe balasangalala cancinencine.

¹² Ncakwiila noBaami baLesa ndimwe mupa coolwe kubaluleme. Lusuno lwanu ulo luli anga ndiyawo lulabacingilisha.