Kulumbaisha 49 - Baibo Busansulushi Bwa Libuku Ili

Buluya bwakucinka manungo mububile

Kumutanjilili wa bwiimbi. Lwiimbo lwa bana bakwe Kola.

¹ Amunyumfwe cikani ici noonse nobantu. Amukutike noonse nomwikala mucishi ca panshi,

² boonse basumpukite abatasumpukite, ncakwiila babile abakandu boonse.

³ Mumulomo wangu mulaakuswabo makani abusongo, shiswa kumoyo wangu shilaakuba shintu shinyumfwika.

⁴ Ndaakuteya matwi angu kutushimpi, Ndaakulabulula kalabi kangu kwiinda mukulisha kalumbu.

⁵ Ino inga ndaloondanshi muciindi ca mapensho? Inga ndatilimukilanshi na balwani bangu banshinguluka?

⁶ Balo mbantu bacinkite manungo mububoni bwabo alimwi balisumpula ceebo cakufula kwa mbubo.

⁷ Ncakwiila taaku muntu weenga walilubula mwiine. Taaku muntu ukonsha kulipila mweelo wa buumi bwakwe kuli Lesa.

⁸ Mukwiinga buumi bwa muntu bulicite mweelo unene abuumbi. Taaku muntu ukonsha kuukwanisha

⁹ akutolelela kunoocili muumi, ee, kutayaawo mucuumbwe.

¹⁰ Ndushinisho basongo abalo balafwa, batacite maano boonse balaloba, akunooshiyabo buboni bwabo kubamwi.

¹¹ Shuumbwe shabo ngomaandaabo a lyoonse alyoonse, shilaakuba njemisena yabo yakwikalaamo kwamuyayaya nabi kakuli misena njebakatumba meenaabo.

¹² Muntu taanungilwi buumi kububoni bwakwe buunji. Sombi ulyeelete kufwa bweenka mbuli banyama.

¹³ Ono iyi njenshila ya bantu bacinka manungo muli mbabo beene. Ee, aya ngomeelelesho a baabo bacinkite manungo mububoni bwabo.

¹⁴ Balibambitwe kuya kumusena wa bafu bweenka mbuli mbelele. Lufu ndoluya ceembela bantu abo. Baluleme balaakubeendelesha macuunsa. Mibili yabo yaakunoobola cakufwambaana mumusena wa bafu kulaale amaandaabo abotu.

¹⁵ Sombi Lesa nebo ulaakumpulusha kuswa munkusu sha lufu. Ncakwiila nebo ulaakutambula.

¹⁶ Tamweelete kukankamana na muntu wabila. Ee, na buboni bwakwe bwafulilaako

¹⁷ ceebo aakufwa, shoonse ulaakushishiya. Buboni bwakwe teshi akayaabo amucuumbwe.

¹⁸ Nakubi kwaamba ayi muntu wabona ayi ncakwiila walya pacishi ca panshi, alimwi na walumbaishikwa kubantu ceebo cakusumpuka mubuumi bwakwe

¹⁹ ciboolelo nkulufu uko kwakaya bamashali bakwe bakulukulu. Kumusena uyo munshinshe toomaani.

²⁰ Anu muntu taanungilwi buumi kububoni bwakwe buunji. Sombi ulyeelete kufwa bweenka mbuli banyama.