Kulumbaisha 48 - Baibo Busansulushi Bwa Libuku Ili

Siyoni ndabala yakwe Lesa

Lwiimbo lwa bana bakwe kola.

¹ Mwaami Lesa ulicite nkusu shikankamika! Ulyeelete kulumbaishikwa abuumbi mundabala inene yakwe Lesa, Lesa wesu, ncakwiila pakalundu kakwe kasalalite.

² Siyoni, kalundu kakwe Lesa kasalalite nkalaamfu cakweebeleka. Nindabala inene ya Mwaami Shinkusu iyo isangalasha cishi ca panshi coonse.

³ Lesa kwiinda mukucanika mukati ka malinga a njiyo, watondesha kwaamba ayi ndabala iyo ilitabilitwe kabotu.

⁴ Bamaami bakalinga kulibungabunga akuya ayi balwane ndabala inene iyo.

⁵ Sombi kwiibonabo bakakankamana. Bakaloonda abuumbi akuswaako lubilo.

⁶ Mpomunyaawo boowa bwakabacata akulisukama kunene. Ee, cakubabo anga ngumwanakashi ucite lifumo lyabuka.

⁷ Mwebo nobaLesa, mwakabanyonyoola anga ngamaato aya kuTashishi, ayo akanyonyoolwa acipuupu ciswa kwicwe.

⁸ Ncakwiila ceenka ncetwakanyumfwa, nceceeco ncetwabona mundabala inene ya Mwaami Lesa Shinkusu shoonse, ee, ndabala inene ya Lesa wesu. Lesa uleelama kuswa kubalwani lyoonse alyoonse.

⁹ NobaLesa mukati muŊanda yanu, tulakutumana akuyeeya palusuno lwanu lutamaani.

¹⁰ Ono bweenka liina lyanu mbolipukite, abalo bamulumbaisha mbobakumenebo cishi coonse ca panshi, mukwiinga lyaansa lyanu lyalulyo liliswitebo bululami.

¹¹ Kuli kusangalala muKalundu ka Siyoni. Muli kukondwa mumishi ya Juda, ceebo muloombolosha kabotu.

¹² Nobantu bakwe Lesa amushinguluke ndabala ya Siyoni. Amubelenge maanda alaamfu aliimo.

¹³ Lubumbu lomwi lomwi amuluboneshe, mulangilishishe malinga a njiyo, kwaamba ayi mukalwiiteko lishalane licisa.

¹⁴ Ceebo Lesa uyo ngoLesa wesu kwamuyayaya Ndushinisho ulaakunootutanjilila tibili akumeelelesho.