Kulumbaisha 47 - Baibo Busansulushi Bwa Libuku IliLesa ngumwaami wa cishi coonse Kumutanjilili wa bwiimbi. Lwiimbo lwa bana bakwe Kola. 1 Amukambe mapaka mwebo nobantu bamumishobo yoonse. Amoolobeshe kuMwaami Lesa pakumwiimbila nyimbo shakusangalala. 2 Mwaami Lesa wa kwiculu Wiindaawo ulayoosha. Lakwe nguMwaami wa nkusu ulela cishi coonse ca panshi. 3 Amubone wakatukomenaako mishobo iinji ya bantu, ncakwiila wakalengesha mishobo iinji kuba mubweendeleshi bwesu. 4 Cishi cino ncetwikalaamo ngowakatusalila. Sobamulunyungu lwakwe Jakobo, wakatupa cishi ici ncetusuni ceebo ulitusuni. 5 Lesa watanta pacuuna cakwe ca bwaami, bantu kaboolobesha cakusangalala, mapeenga kaalila, ncakwiila Mwaami Lesa watanta. 6 Amulumbaishe Lesa munyimbo, amumulumbaishe munyimbo! Amulumbaishe Mwaami wesu munyimbo, ee, amumulumbaishe munyimbo! 7 Mukwiinga Lesa nguMwaami wa cishi coonse ca panshi. Ee, amumulumbaishe munyimbo! 8 Lesa ulalela mishobo yoonse ya bantu, kuswa pacuuna cakwe ca bwaami cisalalite apo mpweekala. 9 Baleli boonse ba mishobo imwi yoonse balabungana pantu pomwi abantu bakwe Lesa, Lesa wakwe Abulaamu, mukwiinga bamaami boonse ba pacishi ca panshi cino mbakwe Lesa. Ncakwiila lakwe ngooindaawo kulemekwa. |
Lenje Bible with Deuterocanon © Bible Society of Zambia, 2003.
Bible Society of Zambia