Kulumbaisha 46 - Baibo Busansulushi Bwa Libuku Ili

Lesa uli aswebo

Kumutanjilili wa bwiimbi. Lwiimbo lwa bana bakwe Kola mumukumo wa Alamoti.

¹ Lesa nceciyubilo cesu alimwi ngootupa nkusu, ulilibambite kutucafwa lyoonse ndituba mumapensho.

² Aboobo teshi tukaloonde nabi cishi cikatenkaanishikwe, atwalo tulundu tukapile panshi peene mulweenge.

³ Nabi maanshi a mumo ayoome akupanga lyoofu, atwalo tulundu tukatenkaane kumaaba ayoosha a ngawo.

⁴ Nkooli mulonga uleta shoolwe mundabala inene yakwe Lesa. Ee, mumusena usalalite umo mwikala Lesa wa kwiculu Wiindaawo.

⁵ Ncakwiila Lesa mwaali mundabala inene iyo, teshi ikanyonyoolwe. Lesa ulaakwiifuna paciindi cakumuyamaca.

⁶ Bamumishobo imwi baliloondete abuumbi, bweene bomwi abomwi bwatenkaana. Lesa ulalulumabo, lyalo cishi ca panshi cilasunguluka.

⁷ Mwaami Lesa Shinkusu shoonse uli aswebo. Ncakwiila Lesa wakwe Jakobo nceciyubilo cesu.

⁸ Kamwisa mubone Mwaami Lesa nshaakacita, ee, mubone shintu shikankamika nshaakacita pacishi ca panshi.

⁹ Ulamana nkondo mucishi ca panshi coonse. Ulatyoloola mata akunyonyoola masumo, alimwi ulatenta mayawo mumulilo.

¹⁰ Lesa ulaamba ayi, “Amukale muluumuno akwishiba ayi nebo ndime Lesa, ulemekwa pakati ka mishobo yoonse, alimwi ulemekwa mucishi coonse ca panshi.”

¹¹ Mwaami Lesa Shinkusu shoonse uli aswebo. Ncakwiila Lesa wakwe Jakobo nceciyubilo cesu.