Kulumbaisha 45 - Baibo Busansulushi Bwa Libuku Ili

Lwiimbo lwa pabwiinga bwa mwaami

Kumutanjilili wa bwiimbi. Mumukumo wa “maluba.” Lwiimbo lwa bana bakwe Kola lwiitwa ayi mashikili. Lwiimbo lwa bwiinga.

¹ Moyo wangu uliswitebo maswi abotu, ndilibambite kwiimbila mwaami. Mulaka wangu ulibo anga ncakulembesha ca shikulemba ucibwene.

² Ndimwe mwiindaawo kuboneka kabotu pabasankwa bamwi boonse, awalo mulomo wanu ulaamba caluse mukwiinga Mwaami Lesa wamupa coolwe ca lyoonse alyoonse.

³ Amukobeke mupeeni wanu kulubasu lwa kukasolo mwebo nobeshinkusu, mweende ca bwaami mubulemu bwanu.

⁴ Kamuya mubulemu bwanu mukakome balwani banu. Muye mukeemikanine lushinisho abululami. Lyaansa lyanu lya nkusu lilaakumulengesha kukoma.

⁵ Ncakwiila mifwi yanu ilikolete, ilapulinkana akuyasa balwani kumyoyo. Aboobo mishobo imwi ilakomwa akulyatililwa kuli ndimwe.

⁶ Bwaami ubo bwakamupa baLesa mbwa lyoonse alyoonse. Mubweene bwanu mulaakweendelesha bantu banu cabululami.

⁷ Mwebo ncemusunibo mbululami, sombi bubi mulibupatite. Nceceeco Lesa, Lesa wanu ncaakamusalila, akumupa kusangalala kwiindaawo, pabamaami bamwi boonse.

⁸ Mingaanjo yanu yoonse itoonunkilabo mule amafuta amwi anunkila kabotu. Beshikulisha shilimba balamusangalasha mumaanda a bwaami akaboteshekwa ameeca ansofu.

⁹ Pakati ka banakashi balemekwa, mpopacanika baana banakashi ba bamaami. Kululyo lwa cuuna canu ca bwaami nkokuli nabwiinga wa kubwalo ulifwete shakubotesha sha golodi wiine wiine.

¹⁰ Nobanabwiinga ba kubwalo, amukutike alimwi munyumfwishishe. Bulya ono amulube bene mishaanu pantu pomwi abeshikamukowa banu.

¹¹ Lyalo kubota kwako kulaakulengesha mwaami kukusuna. Ulyeelete kunoomupa bulemu ceebo bulya ngumwaami wako.

¹² Bantu ba kuTaya balaakukuletela shipo, abalo babile balanoolibotelesha kuli ndiwe ayi utabapaati.

¹³ Amubone nabwiinga wakubwalo mbwaaboneka kabotu muŋanda ya bwaami. Amubone mbwaaelelwa mushakufwala shakatungilwa kumwi agolodi!

¹⁴ Bamutola kubaami mushakufwala shakaboteshekwa. Bamyooye beshikushindikila abalo batooya cikonkela pesule akushishikwa kuli ndimwe nobaami.

¹⁵ Besa cakusangalala akukondwa, akwinjila muŋanda ya bwaami.

¹⁶ Mwebo nobaami, mulaakuba abaana basankwa baanji abo beshi bakabe pamisena ya bamashali banu bakulukulu. Mwebo mulaakubalengesha kuba bamaami mucishi coonse ca panshi.

¹⁷ Ndaakumutola mpuwo akumashalane oonse acisa kunembo, paceebo ceeco bantu boonse balaakunoomulumbaisha kwamuyayaya.