Kulumbaisha 44 - Baibo Busansulushi Bwa Libuku Ili

Mupailo wakusenga kufunwa

Kumutanjilili wa bwiimbi. Lwiimbo lwa bana bakwe Kola lwiitwa ayi mashikili.

¹ NobaLesa, twakalinyumfwila amatwi esu, bamashali besu bakulukulu bakatulwiita milimo njemwakacita munshiku shabo.

² Twakanyumfwa mbomwakatanda mishobo ya bakunsengwe mucishi, akukalikaamo bamashali besu bakulukulu mucishi cabo. Twakanyumfwa mbuli mbomwakaanisha mishobo imwi yoonse, akulengesha mushobo wa bantu banu kuswitilila.

³ Bantu banu tabakwe kukoma bamucishi ico kwiinda mumipeeni yabo, sobwe. Ncakwiila teshi nkusu shabo shakalengesha ayi bakome. Sombi nkwiinda munkusu sha lyaansa lyanu lyalulyo abulemu bwanu butowa. Mwakacita boobo mukwiinga mwakalinga kubasuni.

⁴ Mwebo muli Baami bangu alimwi ndimwe baLesa bangu, baLesa abo balengesha bamulunyungu lwakwe Jakobo kukoma.

⁵ Kwiinda muli ndimwe balwani besu balaboola pesule kuboowa. Kwiinda muliina lyanu tulakoma balwani besu cakumaninina.

⁶ Nebo shicinkite manungo mubuta bwangu. Nebo nshikomi kwiinda mumupeeni.

⁷ Sombi ndimwe mutulengesha kukoma balwani besu. Ncakwiila ndimwe mulensha nsoni abo batupatite.

⁸ Swebo tulalisumpwita muli Lesa nshiiku shoonse. Tulaakunoolumbaisha liina lyanu lyoonse alyoonse.

⁹ Ono bulya mwatufutatila akutulekela mumaansa abalwani besu. Bulya mwakacileka kuya abashilumamba besu mukulwana.

¹⁰ Mwakatulengesha kuboola pesule kuloonda balwani besu, abalo balwani abo bakasaala buboni bwesu.

¹¹ Mwakatwaaba ayi tunyonyoolwe anga nimbelele kunkalamu, alimwi akutupalanganishisha pakati ka mishobo imwi.

¹² Mwakoolisha bantu banu pamweelo uniini, kubacita anga taaku mbobabete.

¹³ Mwakatulengesha kuba pakusekela kubashikamukobonyineesu, ncakwiila twaba bamushibulukwa alimwi bamuwelwa kubaabo mbotwikalaabo.

¹⁴ Mwatulengesha kuba ntantaala ya maleende ya mishobo imwi, bulya kulilabo utokwiinda ulapukumuna mutwi pali ndiswe.

¹⁵ Nebo musebaanyo ulankumbata lilaya mukwipila. Lyoonse ndishi kweendabo aciwa cilokete kunsoni,

¹⁶ ceebo ca maswi a mucobwe akutonta ayo aswa kubalwani bangu abo bancitile mfundilishi.

¹⁷ Ishi shoonse shatubonekela nakubi kwaamba ayi tatukwe kumufutatila, nabi kupwaya cipangano ncemwakapanga aswebo.

¹⁸ Taaku bushiku mbotwakamwaalookilaawo. Tatukwe kucilekaawo kukonkela milawo yanu.

¹⁹ Nakubi boobo mwatushiya pakati ka baumpe kwakubula ashikutucafwa, kutushiya sweenka mumunshinshe ushiya mbi.

²⁰ Nitwakacileka kulambila ndimwe nobaLesa akutalika kulambila balesa beensu,

²¹ naakwiinga mwebo mwakeshiba mukwiinga mwebo mulishi miyeeyo yesu yabushishi.

²² Ceebo ca ndimwe tulacaikwa bushiku abushiku, ee, nceebo ca ndimwe ncetutoocitilwa anga nimbelele shakucaya.

²³ Amubuke noBaami baLesa! Ceebonshi mutoocita anga mulilete? Amulisakamune! Mutatoleleli kutufutatila.

²⁴ Anu mutoolishisilanshi kuswa kuli ndiswe? Mapensho amakatasho esu mutaaluubi.

²⁵ Twawita mubulongo akulyatoolwa, toona mulusuko ceebo cakukomwa.

²⁶ NobaLesa, amunyamuke mwise mutucaafwe! Amutupulushe ceebo ca lusuno lwanu lutamaani.