Kulumbaisha 42 - Baibo Busansulushi Bwa Libuku Ili

LIBUKU LYABILI (Kulu 42—72) Mupailo wa muntu uli mucishi ca busha

Kumutanjilili wa bwiimbi. Lwiimbo lwa bana bakwe Kola lwiitwa ayi mashikili.

¹ Bweenka nsefu mboilila kunwa maanshi atontola, mbweeke ubo moyo wangu mbootoolila ndimwe noBaami baLesa.

² Moyo wangu utoolila Lesa, ncakwiila Lesa uyo muumi. Anu nebo inga ndaya lili mukulambila pameenso akwe Lesa?

³ Minsonshi yacita kuba anga ncecakulya cangu malumwi amashiku. Abalo bantu baliciteko kuntonta ayi, “Anu Lesa wako uli kuli?”

⁴ Moyo wangu ulacisa na ndeebaluka nshiku shainda. Ee, nshiku ndakalinga kweendela mucikuuku ca bungabwa kuya muŊanda yakwe Lesa. Lyakalinga kuba likoto lya bantu bakondetwe bakalinga kuya ciimba anyiimbo shakulumbaisha Lesa.

⁵ Ono nebo ceebonshi ntokuungumana bobulya? Ceebonshi ndapenga bobulya amoyo? Nebo aanangilebo muli Lesa. Ndaakumulumbaisha alimwi, ee, kulumbaisha Lesa wangu uyo umpulusha.

⁶ Moyo wangu ncakwiila wacatwa buumba. Paceebo ceeco ndanoomuyeeya kuswa kumusena wa Joodani akuKalundu ka Emoni alimwi akuswa kuKalundu ka Misa akwalo ndanoomuyeeya.

⁷ Buumba bwamfwekelesha anga ngamaaba a palweenge. Shimfulunganya ashalo shitoosa anga ngamaanshi atoompoomokela.

⁸ Sombi Mwaami Lesa ulatolelela kutondesha lusuno lwakwe lutamaani bushiku abushiku. Nceceeco anebo lyoonse ncemwiimbila nyimbo, kupaila Lesa uyo umpa buumi buno mbooncite.

⁹ Ndeepusha Lesa, mwaandami wangu ayi, “Ceebonshi mwandubaako? Ino nceebonshi nceshi nokweendabo alyaansa munshingo ceebo ca kulyatililwa kubalwani bangu?”

¹⁰ Nebo citooncima abuumbi, kucimwa kwashika amushifuwa. Balwani bangu balancobola ndibanjipusha ayi, “Anu Lesa wako uli kuli?”

¹¹ Ono nebo ceebonshi ntokuungumana bobulya? Ceebonshi ndapenga bobulya amoyo? Nebo anangilebo muli Lesa. Ndaakumulumbaisha alimwi, ee, kulumbaisha Lesa wangu uyo umpulusha.