Kulumbaisha 41 - Baibo Busansulushi Bwa Libuku Ili

Mupailo wa muntu mulwashi

Kumutanjilili wa bwiimbi. Lwiimbo lwakwe Defedi.

¹ Ulicite coolwe muntu uyo uyeeyela bakandu. Mwaami Lesa ulaakumufuna muciindi ca mapensho.

² Ulaakumulama kabotu akufuna buumi bwakwe. Ulaakumupa coolwe mucishi mwaabete cakutamwaaba kumiyeeyo ya balwani bakwe.

³ Mukuciswa ulaakunoomulama kabotu mubulo bwakwe umo. Ulaakumubushaawo pabulo apo mpweshi akanoocisilwa akumuyumya.

⁴ Nebo ndakaamba ayi, “Ndabiisha pameenso anu noBaami baLesa, amunyumfwile nkumbu akunshilika.”

⁵ Balwani bangu batokwaamba shikani sha bucayi pali ndime. Balisuni kwaamba ayi nebo mfwe, liina lyangu lilobe.

⁶ Abalo abo besa mukumbona tabashomeki, balo baliimfwibo pakunyumfwa makani abiibi pali ndime ayi baapukishe.

⁷ Boonse bampatite balatepeteshanya pali ndime akumfuya. Batoopinga kuncita cintu cibiibi cabucayi.

⁸ Balaamba ayi, “Bulwashi mbwaatoociswa mbubiibi, alimwi teshi bumulekeewo, utoofwa.”

⁹ Ono amweensuma mwiine mwiine ngooncinkitemo manungo, mweensuma ngoondyaakwe mbale yomwi, wambukila.

¹⁰ Sombi mwebo noBaami baLesa amunyumfwile nkumbu, amunjuumye nswe pabulo bwakuciswa kwaamba ayi nkabooshe cishole kubalwani bangu.

¹¹ Ndishi kwaamba ayi mulisangalete pali ndime, mukwiinga balwani bangu teshi bakankomeewo.

¹² Ee, mulancafwa ceebo ndacita shiluleme alimwi mwakambika mubulemu bwanu ayi nookala mumo lyoonse alyoonse.

¹³ Aalumbaishikwe Mwaami Lesa, Lesa wa bene Isilaeli, aalumbaishikwe lyoonse alyoonse. Ameni alimwi ameni.