Kulumbaisha 40 - Baibo Busansulushi Bwa Libuku Ili

Lwiimbo lwakulumbaisha

Kumutanjilili wa bwiimbi. Lwiimbo lwakwe Defedi.

¹ Ndakalindila lucafwo lwa Mwaami Lesa camoyonteeka. Lyalo wakakutika kulila kwangu akunkumbula.

² Mpeeke wakansubula kuswa mucilindi ca lufu umo mwakalinga cineemuneemu ca mankatya. Lyalo wakambwesa akunjimika pamwaandami, ncakwiila pamusena apo pataapu cakulisukama.

³ Wakanjiisha lwiimbo lupya, lwiimbo lwakulumba Lesa wesu. Bantu baanji baakubona boobo balaakulemeka akucinka manungo muMwaami Lesa.

⁴ Balicite coolwe abo bacinkite manungo muMwaami Lesa. Ee, abo batasandukili kushibumbwabumbwa nabi kusenkana abaabo balambila tulesa twakubeca.

⁵ Shintu shikankamika nshemwakatucitila nshiinji, noBaami baLesa, baLesa besu. Taaku ukonsha kushimika shintu nshemwakatubambila. Nshikoonshi kushaamba shoonse mukwiinga shafulisha.

⁶ Mwebo tamusangalalili mumilambu nabi mushipo. Milambu yakutenta nabi yakumana shibiibi tamucite asho ncito. Sombi nebo mwakampa matwi akunyumfwila ndimwe.

⁷ Ono ndakaamba ayi, “Amubone, ndime pano, ndesa bweenka mbokulembetwe pali ndime mulibuku lya Milawo.

⁸ NoBaami baLesa ndisunishi kucita kuyanda kwanu. Ee, milawo yanu moili mumoyo wangu.”

⁹ Kulikoto lya bantu ndaambilisha shabululami bwanu, nshuumunibo sobwe, amwebo mbomwishi noBaami baLesa.

¹⁰ Bululami bwanu nshibushiisi mumoyo wangu, kushomeka kwangu alupulusho lwanu ndashaamba. Nshishisi lusuno lutamaani akushomeka kwanu kulikoto lya bantu banu.

¹¹ NoBaami baLesa, mutakashi nkumbu shanu kwisa pali ndime. Lusuno lwanu lutamaani akushomeka ashimfuune.

Kusenga lucafwo

¹² Nebo ndisakatitwe amapensho aanji koonse koonse, shibiibi shangu shafulisha abuumbi cakuncala ameenso. Ee, shiinji kwiinda misusu yangu ili mumutwi. Paceebo ceeco ndatyongola abuumbi mumoyo wangu.

¹³ NoBaami baLesa amumfuune! Amuncaafwe cakufwambaana!

¹⁴ Bafwima buumi bwangu abakakomwe cilensha nsoni akupilinganishikwa maano. Ee, abo boonse bampingite abakakomwe akulokwa cakufuulwa bulemu.

¹⁵ Boonse abo banenga buluya akuseka abakoongumanishikwe ceebo cakukomwa.

¹⁶ Sombi abo balambila ndimwe abasangalale akukondwa muli ndimwe. Boonse abo balila lupulusho lwanu kabaamba lyoonse ayi, “Mwaami Lesa ncakwiila ulicite nkusu shiindaawo.”

¹⁷ Nebo pano taaku amboombete, sombi mulambikako maano. Ncakwiila mwebo muli bapulushi bangu abaLesa bangu, amuncaafwe cakufwambaana.