Kulumbaisha 39 - Baibo Busansulushi Bwa Libuku Ili

Kulyaambilila kwa muntu upengete

Kumutanjilili wa bwiimbi. Lwiimbo lwakwe Defedi lwakalembelwa Jedutuni.

¹ Ndakaamba ayi, “Ndanoolilama akukasha mulomo wangu kubisha. Ndaakucala mulomo wangu ciindi coonse, kulilabo bamucita shibi kabacili anebo.”

² Nebo ndakalinga kunokuumwite cakutaambaawo nabi comwi. Nakubi boobo mapensho angu akeendaawo kufula.

³ Moyo wangu wapenga abuumbi mucaamba cangu. Ndindakalinga kuyeeya, moyo wangu wakapenshekwa abuumbi. Lyalo ndakaamba kumulomo wangu ayi,

⁴ “NoBaami baLesa, amumboneshe kweela buumi bwangu. Ee, mbone kuceya kwa nshiku shangu. Anshibe kufwiimpa kwaciindi ca buumi bwangu.”

⁵ Inshiku sha buumi bwangu mwashifwiimpisha, Myaaka ya buumi bwangu njiniini abuumbi pameenso anu. Ncakwiila buumi bwa muntu uli woonse buli anga nkuyoya kwalinkanda lyomwi.

⁶ Anu ndushinisho muntu nabi uleenda, ulibo anga ncimfule. Shintu shoonse nshaacita taaku mboshibete. Muntu ulabunjika buboni kaateshi aweshi akabubweese.

⁷ Ono noBaami baLesa, inga ndalangilanshi acimwi? Nebo kulangila kwangu kuli muli ndimwe.

⁸ Amumfuune kuswa kushibiibi shangu shoonse, mutandekeleli kwaamba ayi nooshibulukwa kubaluya!

⁹ Ndakalinga kuumwite cakutacalulaawo mulomo, mukwiinga mwebo ndimwe mwakasuminisha ayi mpenge bobulya.

¹⁰ Amukushe lyaansa lyanu lya bukali pali ndime! Ntooyanda kufwa kushuumo shanu.

¹¹ Mwebo mulapa mulandu akukalalila muntu ceebo ca shibiibi shakwe. Mulanyonyoola buboni bwakwe anga ngamacenje. Ncakwiila buumi bwa muntu uli woonse buli anga nkuyoya kwalinkanda lyomwi.

¹² Amunyumfwe mupailo wangu noBaami baLesa, amukutike kusenga lucafwo kwangu. Mutapuululi kukulila kwangu, mukwiinga ndi mweensu bweenka mbuli bamashali besu bakulukulu.

¹³ Amundekeeko ngumwewo muuwo kaantana kufwa, ee, kaantana kushimingana akuloba.